NOG ’N OPVOPVOLG BEPLAN
Affleck het selfversekerd in Hollywood ’n deurbraak gemaak met Oscars vir die draaiboek van hul trefferfliek Good Will Hunting. Matt het dit uitgedink terwyl hy vir ’n graad in Engels aan Harvarduniversiteit studeer het. Hy het opgeskop voor hy graad gevang het.
Matt het die sukses opgevolg met naamrolle in trefferrolprente soos The Talented Mr. Ripley en Saving Private Ryan.
Maar die akteur erken sy sukseslopie het kort daarna skielik tot stilstand gekom en voor hy vir die eerste keer as Jason Bourne verskyn het, het hy “in ses maande nie ’n werkaanbod gekry nie”.
Hy vertel toe die rol in The Bourne Identity eindelik oor sy pad kom, het die rolprent al die kenmerke van ’n volslae flater gehad. “Dit is uitgestel, dit is vertraag, daar is oorgeskiet en almal het gesê: ‘O, hierdie een gaan ’n mislukking wees.’ ”
Hy kon dit nie erger mis gehad het nie. Die rolprent – en sy twee opvolge, The Bourne Supremacy en The Bourne Ultimatum – was ’n loketsensasie. Al wat ’n tienerseun of jong man is, het meteens daarvan gedroom om soos Bourne vuiste te swaai en S-draaie te gooi sonder om ’n gesigspier te verroer. Matt is dankbaar daarvoor. “Dis onmeetbaar hoeveel dié rolprente my loopbaan gehelp het.”
Matt is die middelkind van Kent, ’n aandelemakelaar, en Nancy, ’n professor in vroeë opvoedkunde. Sy ouers wou ’n seun grootmaak wat ’n begrip van die wêreld om hom het. In sy vroeë tienerjare het sy ma hom op reise na armer lande geneem sodat hy en sy ouer broer, Kyle, en jonger suster, Sarah, kon sien hoe mense buite Amerika leef.
“Ons het deur Mexiko en Guatemala gaan rugsakreis. Ek onthou ons het op busse gery wat vol hoenders geprop is. Ek het nog nooit sulke goed gesien en armoede aanskou soos ek daar teëgekom het nie.”
Hy sê hy sou graag sy kinders op soortgelyke reise wou neem wanneer hulle hul Matt, sy vrou, Luciana Barroso (in swart), en hul vier dogters: van links Gia, Alexia (sy stiefdogter), Isabella en Stella. Hulle is ’n hegte, gelukkige gesin.
miljoen
vroeë tienerjare bereik. Hy is 11 jaar getroud met Luciana Barroso (40) en het drie dogters, Stella (6), Gia (8) en Isabella (10), en ’n stiefdogter, Alexia (18).
Dié toegewyde pa sê hy neem sy gesin in ag voor hy ’n rol aanvaar wat hom te lank van die huis af sal wegneem. “Elke besluit om ’n rolprent te maak is eintlik die gesin se besluit. As dit te ontwrigtend gaan wees, kan ek dit net nie aanvaar nie. Ons probeer om nie meer as twee weke uitmekaar te wees nie.”
Matt en Luciana het mekaar in 2003 ontmoet terwyl sy in ’n kroeg gewerk het in Miami, waar hy die rolprent Stuck on You (2003) verfilm het. Die twee is twee jaar later getroud in ’n privaat burgerlike plegtigheid en is sedertdien gelukkig saam.
Maar hoe onderhou ’n groot loketster ’n gelukkige huwelik, gesonde gesinslewe en suksesvolle loopbaan?
Volgens Matt kry hy dit reg deur baie vervelig te wees.
“Dis regtig seks en skandale wat tydskrifte laat verkoop, en daar is niks skandaligs aan ’n ou wat getroud is en kinders het nie. As verslaggewers uitkom na waar ek woon, sal hulle van verveling sterf.”
Wel, met al die adrenalien wat Jason Bourne deur fliekgangers se are laat pomp, kan ’n mens Matt seker vergewe dat hy in sy vrye tyd die saai lewe verkies. BRONNE: EONLINE.COM, DAILYMAIL.CO.UK, THEGUARDIAN. COM, TELEGRAPH.CO.UK