SUKKEL . . .
DIT het hul hart gebreek om te sien hoe hul dogter sukkel. Elke dag het Nina* (13) ure lank voor haar wiskundeboeke gesit, maar wanneer die toetspunte gekom het, was dit altyd dieselfde slegte nuus: Sy het gedruip.
Karel en Stephanie Kriel* van Groblersdal in Limpopo was radeloos. “Sy kom al haar vakke goed deur, maar kan eenvoudig nie wiskunde bemeester nie,” sê Karel oor Nina, wat nou in gr. 7 is.
“Sy het al dae aaneen gesit en wiskunde oefen, maar kon dit net nie regkry nie.”
Ekstra klasse het nie gehelp nie. Ook nie wanneer haar ma en pa geduldig probeer verduidelik het nie.
Toe spreek hulle ’n opvoedkundige sielkundige. Ná baie trane het Karel en Stephanie eindelik ’ n diagnose: Nina het ’n leerprobleem wat beteken ’n mens kan nie met syfers werk nie. Dit was voorheen bekend as diskalkulie. Al probeer sy hoe hard, sal sy nie wiskunde kan baasraak nie.
Die volgende stap was om die skool te oortuig om die verslae te aanvaar. “Hulle wou haar ’n jaar terughou omdat sy wiskunde druip; toe wend ek my tot die provinsiale onderwysdepartement. Ons wil hê Nina moet vrygeskeld word van wiskunde. Al probeer sy baie, baie hard, kry sy dit net nie onder die knie nie.”
As Nina se ouers daarin slaag om die kwytskelding te kry, sal sy ’n ander vak in die plek van wiskunde moet neem, verduidelik Catherine Radloff, ’n opvoedkundige sielkundige van Kaapstad.
“Kinders is veronderstel om hul huistaal, ’n addisionele taal en wiskunde te slaag. As ’n kind sukkel om te lees, kan hy byvoorbeeld van die tweede taal vrygestel word.”
Maar jou kind moet dan ’n alternatiewe vak in dié een se plek neem, voeg sy by.
As jy dus kan bewys dat jou kind ernstige leerprobleme met ’n spesifieke vak het of aan steurings soos aandagtekorthiperaktiwiteitsteuring ly, kan jy aansoek doen dat hy of sy glad nie die vak hoef te neem nie, verduidelik Brenda van Rooyen, ook ’n opvoedkundige sielkundige van die Moederstad.
Daar is ook minder drastiese vergunnings, soos ekstra tyd om eksamens af te lê, ’n afsonderlike eksamenlokaal en selfs ’n skribent. (Sien die kassie regs bo vir ’n volledige lys vergunnings.)
Maar moenie dink dis ’n kitsoplossing as jy en jou kind nie meer lus het om die akademiese stryd aan te durf nie, waarsku Brenda. “Toegewings is die allerlaaste stap vir kinders met leerprobleme.
“Die kind sal ’n geskiedenis van leerprobleme moet hê en julle sal eers ander moontlike oplossings, soos terapie, moet beproef voor kwytskelding op die ou end toegestaan word.”