LIGTE, KAMERA . . . NEE, DIS RÉGTIG!
Vir Clint en sy Namibiese skoonheid was dit soos in ’n fliek toe hulle ná ’n blitsromanse ’n droomtroue het
DIE man onder die populierbome kyk opgewonde oor die koppe van die gaste vir ’n glimp van sy bruid, ’n effense frons tussen sy oë. Dan sien hy haar aankom en die frons verdwyn soos mis voor die son. Dis die akteur Clint Brink, beter bekend as dr. Steve Abrahams van Binnelanders, wat vandag hier in die Askariwildreservaat naby Magaliesburg afhaak. En nee, hy’s nie op stel nie – al klink sy blitsromanse van skaars vier maande met die Namibiese skoonheid Steffi van Wyk soos iets uit ’n sepie.
Die 24-jarige Steffi lyk asemrowend aan die arm van haar pa, Steven, in ’n wit klassieke, sjiek rok met ragfyn kant en kralewerk. In haar bruidsruiker pryk ’n groot protea. Dié blom simboliseer voorspoed, het Steffi – Mej. Namibië 2015 en wenner van die Mej. Wêreld- sport- uitdaging in dieselfde jaar – vroeër vertel.
“Dis soos ’n feëverhaal,” beskryf Clint (35) later die plegtigheid onder die populierbome. En dis boonop ’n baie moderne feëverhaal: Hul vriendskap het op sosiale media begin en geblom nog voor hul eerste ontmoeting. Clint was so oortuig sy’s die een vir hom dat hy begin het om die troue te reël nog voor hy Steffi die jawoord gevra het.
Waar hulle ingehaak voor die pastoor staan, vee Clint kort-kort die trane van sy Namibiese plaasmeisie se wange af. Nadat die ringe aangesteek is, soen hy sy bruid lank en innig. Die 120 gaste, onder wie die Springbok-rugbyspeler Lionel Mapoe, klap hande en fluit goedkeurend. Dan gooi hulle veelkleurige blomblare na die paartjie, wat tussen hulle deurstap op pad na die amptelike fotosessie – wat twee olifante insluit.
“Ons hou baie van die buitelewe en is natuurmense,” verduidelik Steffi later oor die keuse van trouplek en die ongewone “gaste”.
“Dis waarom ons in die bos wou trou. Dit pas so goed by ons albei se persoonlikheid.”
CLINT het Steffi die eerste keer op Instagram raakgesien toe sy verlede jaar haar geboorteland in die Mej. Wêreld-kompetisie verteenwoordig. Sy het foto’s van die geleentheid op sosiale media gedeel. “Ons het mekaar se profiele baie interessant gevind omdat ons ’n passie vir sport en fiksheid deel. En ons voel albei sterk daaroor om met ons talente ’n verskil in ander se lewe te maak,” vertel Clint.
Steffi beaam: “Instagram het vir ons ’n goeie oorsig gegee van wie die ander mens is en waarin elkeen belangstel.”