TANYA SE TOPWENKE VIR MATRIEKS
JOU belangrikste eksamen tot dusver lê om die draai. Jy behoort vuur en vlam te wees, maar saans wanneer jy voor die boeke gaan sit, is jy te moeg om jou oë oop te hou. Soggens voel jy niks beter nie; jy is pootuit vandat jy wakker word. Die spanning van die matriekeindeksamen kan omtrént jou gesondheid deurmekaarkrap. Maar ongesonde eetgewoontes en die verkeerde leefstyl kan ook maak dat jy die nodige energie kortkom.
Party mense probeer hul energievlakke opstoot deur suikerdrankies en gemorskos te eet, maar al wat dit regkry, is om hul middel te laat uitsit.
Nou is nie die tyd om te laat slaplê nie; jy wil immers jou matriekvakansie met selfvertroue kan geniet en jou eksamen met vlieënde vaandels slaag. Die regte eetplan kan sorg dat jy genoeg breinkrag het vir die vraestelle, en genoeg energie om te oefen en goed te lyk met jou matriekvakansie.
“Eet gereeld, slaap genoeg en oefen,” sê Tanya Alberts, ’n dieetkundige van Johannesburg. Dis belangrik om nie op kitsoplossings – soos laatnagkafeïen – staat te maak om jou deur dié dae te kry nie. “Kweek liewer gewoontes aan wat jou geheue sal verbeter en jou gesond sal help leef.”
Drink elke dag 2-3 L water en bly weg van gegeurde water propvol suiker. Voeg liewer ’n halwe suurlemoen se sap of kruie, soos ment, of vrugte by jou water om dit geur te gee.
Doen vyf of ses dae per week 30 tot 45 minute lank oefeninge soos kardio-, aërobiese en gewigsoefeninge. Dit sal jou help leer, want jou brein neem meer suurstof op wanneer jy oefen.
Probeer elke dag vyf vuisgrootteporsies vrugte en groente eet, waarvan ’n derde vrugte en twee derdes groente moet wees. Dit bekamp stres omdat dit ongebonde molekules in jou lyf teenwerk en jou bloedsuiker help bestuur.
Stel ’n wekker wat jou herinner om elke drie tot vier uur te eet en moenie maaltye oorslaan nie; dit sal jou metabolisme vertraag en kan jou konsentrasie knou wanneer jy moet leer.
Eet stadiger en bestee sowat 20 minute aan ’n maaltyd. Jy sal besef jy is versadig voor jy kans kry om jou te ooreet.
Hou gerieflike peuselhappies, soos