BONNIE EN CLIVE

Hy is keelvol vir smerige saketransaksies, maar nooit sou Clive kon raai watter rigting sy lewe sou inslaan toe hy sy voet neersit nie

DIE oggend van 10 Oktober was lank, vervelig en vol roetine. Die latere opdrag het Clive Koekemoer nie opgewerk tot die vlak van geesdrif nie. Hy was nog altyd iemand met ’n senuagtige temperament, en in dié toestand keil sy spysverteringskanaal hom op en verduur hy onuitstaanbare pyn.

Jake Loots lyk soos ’n rot. In die koninkryk waarin hy heers, is hy die koning van die rotte.

Dit is nou ses maande dat Clive by Jake se Tweedehandse Motorkoninkryk werksaam is. Hy vermoed alles is nie pluis met Jake se werketiek nie, maar kan niks daaromtrent doen nie. Hy het die paar rand wat hy elke maand ontvang te bitter nodig. Dit verskaf ten minste die brood en botter waarop hy oorleef terwyl hy saans in die buitekamerhokkie by die lendelam tafel sit en 7de Laan en die nuus in Afrikaans getrou op die klein swart-wit skerm volg. Een keer per week koop hy Beeld en bestudeer hy alles oor beskikbare vakatures noukeurig.

Bedags sit hy in die kantoortjie aan die agterkant van die gebou, vasgekeer tussen spinnerakke en dik lae stof, stokou almanakke wiegend aan spykers, verbouereerd en bevrees om verkwalik te word vir alles wat skeefloop. Hy is nie goed met rekenaars nie en maak gedurig foute met die rekenings.

Clive sit oorkant Jake, verskrik deur die werklikheid van die opdrag.

Jake, groot en sweterig met ’ n potloodsnorretjie en ’n boepens, sit agteroor en grinnik, die ring aan sy vinger ’n swart seer.

“Hoekom moet ek die motors se kilometers terugdraai? Hoekom kan Freddie dit nie doen nie?”

Jake eet ’n oliebol, sy lippe soos twee stukke nat spons terwyl hy kou. Clive kyk weg deur die vliegbespikkelde venster na waar blou lug en sonskyn en moontlik opwinding kan wees. Iewers tussen hom en sy uitsig hang ’n groot spinnerak.

“Freddie is vandag in die hof,” sê Jake. “Iets oor agterstallige onderhoud. En daar is kopers. Die karre moet vanmiddag uit.”

Druppeltjies speeksel spat op die lessenaar. Clive sluk. “Dit is oneerlik, Meneer.”

Jake leun terug met ’n snedige uitdruk-