ANDER VLEIS EN SNITTE
Moenie net bees en skaap oorweeg vir die braai of oond nie, meen die kenners.
“Wildsvleis word waarskynlik onderskat,” sê prof. Louw Hoffman, hoogleraar in vleiskunde aan die Universiteit Stellenbosch. Hy verduidelik daar is maatskappye en abattoirs wat wild slag met metodes wat so min spanning moontlik vir die diere veroorsaak.
“Die sogenaamde wilde smaak in wildsvleis is gewoonlik weens die stres wat die dier tydens die jagtog ervaar. Die wildsvleis wat jy deesdae in supermarkte kry, is volgens die Europese Unie se uitvoerstandaarde geslag en verwerk.”
Marieta sê vark is vleis van ’n baie hoë gehalte. Die vleis self is maer omdat die vet aan die buitekant is.
“In die verlede was mense bang vark bevat parasiete, maar gesondheidsinspeksies is deesdae so deeglik dat dit glad nie meer die geval is nie. Mense is ook geneig om varkvleis oorgaar te maak, juis omdat hulle bang is dit het parasiete in.”
Volgens haar is dit slim om nou al genoeg varkvleis vir die feestyd te koop en dit te vries. “Hier van middel November af gaan pryse styg.”
Sy sê vars, ongerookte varkboud is die grootste winskoop. “Nie die snitte wat reeds opgesny en in marinade gelê is nie, want die kleinhandelaar vra geld vir die arbeid.”
Carmen Niehaus, Huisgenoot se kosredakteur, meen hoender is steeds een van die beste bekostigbare opsies wanneer jy onthaal. “Sit ’n heel hoender in die oond of braai ’n plat hoender oor die kole. Hoender- en varkvleis is wonderlik omdat dit by enige geurprofiel pas.”
Wat rooivleis betref, oorweeg gerus die goedkoper snitte. Volgens Carmen word goedkoper vleissnitte gewoonlik die beste berei, met klamhittemetodes soos in ’n bredie op die stoof of ’n potjie in die buitelug.
Gerhard sê dis belangrik om te onthou ’n goedkoper snit is nie noodwendig van