MY DÚÚR FOUT MET KRAKERS
Arno Jordaan het weens ’n vals faktuur nes baie ander mense onder kuberskelms deurgeloop – maar so iets kan verhoed word
ENIGE nuwe ouer sal weet: ’n Mens het maar elke sent nodig, veral as dit jou tweede kind is wat pas aangekom het. En as jy dan boonop haastig ’ n nuwe huis betrek, moet jy elke sent omdraai. Dit is juis onder sulke omstandighede dat jy dit die minste kan bekostig om deur te loop onder swendelaars wat jou broodnodige geld wil steel.
Vra die sanger Arno Jordaan en sy vrou, Lizanie. Hulle laat bou op die Woodhill-gholflandgoed in die ooste van Pretoria ’n huis vir hulle en hul twee kinders, Milan (4) en die pasgebore Luka.
Maar toe loop hulle deur onder kuberkrakers wat hulle uit R25 700 kul. “’ n Mens kan nie dink sulke goed kan gebeur nie,” sê Arno. En dit net omdat hy nie mooi genoeg gekyk het na die besonderhede op ’n faktuur wat hy per e-pos ontvang het nie.
Tot onlangs nog het die Jordaans ’n huis naby hul toekomstige nessie gehuur, maar toe besluit hulle om tydelik na die Silver Lakes-gholflandgoed te trek.
“Ons het op kort kennisgewing ons huurkontrak met die eienaar van ons vorige blyplek beëindig,” vertel Arno, “maar moes noodgedwonge R25 700 betaal omdat ons die bestaande huurooreenkoms moes beëindig. Ons moes blitsvinnig trek, want Lizanie was hoogswanger. Luka het toe op 8 September, ’n week te vroeg, sy opwagting gemaak.”
Maar dis toe, in die haas om die transaksie af te handel, dat dinge skeefloop. Arno het die geld aan die eiendomsagentskap betaal, maar ’n paar dae daarna ’n boodskap van hulle ontvang dat hulle nog nie die geld gekry het nie.
Hy het ondersoek ingestel en tot sy skok uitgevind ’n kuberjakkals het die korrespondensie tussen hom en die eiendomsagentskap onderskep. Dié skelm het vir Arno ’n faktuur in die agentskap se naam gestuur (maar met die skelm se bankbesonderhede op) en hom so sy geld in die verkeerde rekening laat betaal.
Arno het vir Huisgenoot twee fakture gewys waarvan die een ’n oorspronklike faktuur van die eiendomsagentskap is en die ander – met dieselfde briefhoof – amper identies lyk, behalwe die verskil in bankbesonderhede. Op die regte faktuur is bankbesonderhede vir ’n rekening by Rand Merchant Bank, maar die vervalste faktuur wys die rekening is by FNB. (Dié bank het intussen die geld terugbetaal.)
Nog iets wat Arno in die skelms se strik laat trap het, is die feit dat die vals rekening gestuur is van ’n e-posadres wat soos sy vrou s’n gelyk het. Arno het juis gewag dat Lizanie die rekening vir hom aanstuur. Volgens FNB het die skelms waarskynlik vroeër ’n e-posgesprek tussen die twee afgeloer en toe ’n vals adres in haar naam geskep van waar hulle die vals faktuur met hul bankbesonderhede aan Arno gestuur het. “Dis gestuur van die adres lizanie.jordaan@outlook.com, maar my vrou het nie so ’n e-posadres nie,” sê hy.
NIE net Arno het al onder sulke bedrieërs deurgeloop nie. Huisgenoot het berig oor Soozi Dinnie wat verlam is weens ’n fratsongeluk nadat ’n bakkie haar op ’n kampeerterrein getref het (Wonders ná sleephel, 16 Junie). Barmhartiges het R300 000 geskenk sodat sy ’n ergonomiese rolstoel kon bekostig, maar toe onderskep kuberjakkalse die transaksie tussen haar en ’n vriendin, wat ’n bankrekening vir haar geskep het vir die ingesamelde geld (Kuberskelm vort met my