Sal Trump sy beloftes kan nakom?
Die Amerikaanse parlement word die Kongres genoem. Dit het twee huise: die Huis van Verteenwoordigers (amper soos ons nasionale vergadering) en die Senaat (soortgelyk aan ons raad van provinsies), verduidelik die politieke kommentator Leopold Scholtz. “Nes hier word verskillende politieke partye op grond van die verkiesingsuitslae daarin verteenwoordig. Die Amerikaanse kieserskorps verkies verteenwoordigers van die Republikeine asook die Demokrate in albei huise.
“Die president is nie ’n Kongreslid nie en kan net in ’n beperkte mate sonder hulle besluite neem. Die Kongres hou die land se beursie vas en kan finansiering vir die president se planne weerhou.”
Trump se onverwagte oorwinning het die Republikeinse Party – wat reeds in Obama se tweede termyn beheer oor die Kongres herwin het – se meerderheid verder versterk.
Tim glo Trump sal dinge makliker as sy voorganger gedoen kry omdat die Republikeine die meeste verteenwoordigers in die Kongres het.
“Hy sal maklik sy begrotings en groot planne deurgevoer kry, maar hul politieke stelsel werk baie anders,” sê hy. “Dit is nie noodwendig so dat jy altyd soos die base moet stem wanneer jy in die regerende party is nie. Baiekeer sal ’n Republikein vir ’n Demokraat se voorstel stem en andersom.”
Vrees en ’n ‘nuwe wêreld’
“Die wêreld raak meer nasionalisties,” sê Deon. “Trump se oorwinning wys die oplewing van nasionalisme wat ons al jare lank in Europa sien, het ook in Amerika posgevat.
“Oral in Europa is die wit werkersklas – mense in die laer-inkomstegroepe – in opstand omdat hulle glo hul ekonomiese omstandighede verswak weens onder meer vryhandel (ooreenkomste tussen lande vir maklike in- en uitvoer). En as gevolg van beperkte werkgeleenthede en hulpmiddels beskou hulle immigrante as ’n bedreiging.”
Trump se kiesers, verduidelik Deon, is kwaad omdat hulle glo Amerikaanse werkgeleenthede word uitgevoer na lande waar arbeid goedkoper is, wat beteken maatskappye se winste is hoër. ’n Firma vervaardig hul produkte in die buiteland omdat dit daar goedkoper is en dit beteken minder werk vir Amerikaners. Terselfdertyd word produkte goedkoper ingevoer uit byvoorbeeld China – een van Trump se grootste teikens – as wat dit in Amerika vervaardig kan word.
Deon meen ons beweeg ’n “nuwe wêreld” binne met onsekerheid onder wêreldleiers oor Amerika se toekomstige rol as ’n supermoondheid wat eers gaan vra: “Wat kry ek daaruit?” Trump het aan sy ondersteuners verkondig ander lande trek meer voordeel uit bestaande vryhandelsooreenkomste as Amerika en hy gaan dit verander.
Maar soos die Britte nou met Brexit besef, is dit nie so maklik om uit bestaande ooreenkomste te kom nie. Ten spyte van Trump se uitlatings kan dit jare duur.
Ons sien beslis ’n nuwe verskynsel, beaam Theo op sy beurt. “Daar is ’n ‘keelvolfaktor’.”
Maar nee, dit beteken nie die wêreld neig nou skielik na meer “konserwatief ” of “behoudend” nie, verduidelik Theo. “Dis eerder ’n politieke verharding. Mense is besig om viervoet vas te steek. Hulle wil nou weet: Hoe belangrik is ons in ons eie land?”
Leopold meen ’n handelsoorlog dreig