‘GROENER’ WEIVELDE
Oscar is glo baie beter daaraan toe in die kleiner tronk waar hy hom nou bevind en waar gevangenes meer vryheid geniet
DIE eerste ding wat jy sien, is die groenteboorde. Welig lê hulle voor jou in groot groen blokke uitgestrek, met sproeiers wat plek-plek reënboë in die son maak. Aan die einde van ’n pad deur die boorde, so te sê aan die voet van ’n koppie, hurk ’n plat siersteengebou met ’n sinkdak.
Maar hierdie landelike toneel is misleidend. Die sinkdakgebou in die verte huisves die selle van die Atteridgeville Korrektiewe Sentrum – Oscar Pistorius se nuwe tuiste. Dit is hier waar hy die res van sy vonnis van ses jaar vir die moord op die model Reeva Steenkamp gaan uitdien.
“Dit gaan goed met Oscar. Hy is nou op die beste plek waar hy nog was,” sê ’n bron na aan die Pistorius-familie aan Huisgenoot.
Waarom Oscar (30) versoek het om van die Kgosi Mampuru II Korrektiewe Sentrum in Pretoria se stadsgebied oorgeplaas te word na Atteridgeville buite die stad, wil niemand tans verklap nie. “Dit is tussen hom (Oscar) en die tronkowerheid,” is al wat Singabakho Nxumalo, woordvoerder van die departement van korrektiewe dienste, daaroor wou sê.
Maar almal met wie Huisgenoot gepraat het, stem oor een ding saam: Oscar is nou in ’n “beter” plek. Een rede is dat Atteridgeville baie minder gevangenes huisves as Kgosi, waar Oscar die eerste jaar van sy oorspronklike vyfjaarvonnis geslyt het.
En ’n polisiebeampte wat die tronk al verskeie kere besoek het, vertel daar was “nog nooit probleme soos protes deur die gevangenes of ontsnappings nie. Dit is blykbaar ’n ‘lekkerder’ tronk en daar is nie gevangenes wat as gevaarlik beskou word nie,” sê hy.
“Dis soos ’n plaas,” beaam Tanja*, wat al tronkbediening daar gedoen het. As enige gevangene kon kies, sou hy daar wou wees.
NADAT Oscar se vonnis hersien en sy parool opgeskort is, was hy net ’n paar maande terug in Kgosi Mampuru II voor hy vroeg in November na Atteridgeville verskuif is. Dié gevangenis word in die weste begrens deur die woonbuurte Atteridgeville en Laudium en in die ooste deur die militêre kompleks Thaba Tshwane (voorheen Voortrekkerhoogte).
Dis nie net die groenteboorde wat jou aanvanklik laat dink jy is nie by ’n tronk wanneer jy by die hek langs die R55-hoofweg inry nie. Daar is geen vaal mure met rolle lemmetjiesdraad bo-op om die kompleks nie en geen elektriese heining nie. Net ’n groen pallisadeheining wat die boorde en tronkgebou omring.
Deur die heining sien jy die woonhuise van Laudium oorkant die R55 en groepe kinders in skooldrag op pad huis toe.
Die tronk en boorde is geleë op grond wat eers deel was van die uitgestrekte militêre kompleks suid van Pretoria, sê Singabakho. Hier is 1 050 gevangenes – veel minder as die 7 000 tot 8 000 gevaarliker misdadigers in Kgosi Mampuru II, wat 32 persent oorbevolk is.
In Kgosi het Oscar ’n enkelsel gehad. In Atteridgeville is enkelselle sowel as gedeelde selle, maar Singabakho wil “om veiligheidsredes” nie verklap of Oscar alleen aangehou word nie.
Hier is wel ’n spesiale bad vir die voormalige Paralimpiese atleet. Volgens Singabakho is dit nie spesifiek vir Oscar ingerig nie; dis al in Mei gedoen ingevolge ’n nasionale opgraderingsprojek om geriewe vir gestremde gevangenes in alle tronke te verskaf.
Voor sy vrylating op parool het Huisgenoot berig Oscar het baie gewig verloor omdat hy nie die kos in Kgosi wou eet nie. Hy het toe glo oorleef op onder meer blikkieskos wat hy in die tronk se kantien gekoop het (Maer en eensaam in sy swaarkry, 5 Maart 2015).