MAKIETIE IN MONACO ALBERT, CHARLENE EN DIE TWEELING
Saamgestel deur
IN Monaco is dit die belangrikste geleentheid van die jaar: Bewoners van dié prinsdom kom bymekaar om die totstandkoming van hul stukkie paradys aan die Middellandse See te vier. Op hul nasionale dag deel die koninklikes natuurlik in die feestelikhede en verskyn elegant uitgevat op die balkon van die Prins Se Paleis. Vanjaar het drie geslagte van daar vir die skare gewuif, maar dit was die kleingoed wat die kollig gesteel het.
Prins Jacques, die troonopvolger, en prinses Gabriella vier op 10 Desember hul tweede verjaardag. Hul ouers hou hulle meestal uit die kollig; daarom is die opwinding nog groter wanneer hulle wel ’n slag in die openbaar gesien word.
Toe prins Albert en prinses Charlene met hul kinders op die balkon uitkom, het die skare begin wuif en hulle geesdriftig toegejuig – tot Charlene se groot vreugde. “Hul ontvangs het haar duidelik ontroer,” vertel ’n omstander. “Sy het geglimlag en vir die skare ’n soen geblaas.”
Ook prinses Caroline se kleinkinders, Raphaël, Sasha en India, het aandag getrek. En dan was daar die nuus dat haar jongste seun, Pierre Casiraghi, pa gaan word. Prinses Stéphanie, bekend as die rebel, het saam met haar kinders by die ander koninklikes aangesluit. Hier is die wie’s wie van dié familie.