MALAWI TOE IN ’N LUIKRUG
NS bestuur die kragtige Renault Mégane GT, ’n nuwe Franse vuurwa met indrukwekkende eienskappe wat op ’n interessante manier van rigting verander. Stuur ’n motor met sy voorof agterwiele? (Wenk: Dit is ’n strikvraag.) Dis mos die voorwiele, nie waar nie?
Daar is wel motors wat gelyk met die voor- en agterwiele stuur, motors soos die nuwe Mégane GT. Die agterwiele draai egter nie so skerp soos dié voor nie – teen ’n hoek van omtrent 3 grade. Voorstanders hiervan glo dit stuur ’n motor meer doeltreffend. En in die GT?
Met sy gespierde vorm is dié Renault gewis aantreklik. Onder jou vingers voel die kajuit soos ’n Audi s’n. Die gerieflike sportsitplekke voor ondersteun goed. Agter sal twee langes met gemak kan sit en die bagasiebak is groot.
Waar die bestuurder se linkerhand vat, sit ’n enorme raakskerm vir satellietnavi- gasie, klankverstelling, ensovoorts. Die stelsel is nie gebruikersvriendelik nie en soms halsstarrig – net soos die GT se dubbelkoppelaar outomatiese ratkas ( met sewe ratte). Dié ratkas is gekoppel aan ’n vurige 1,6 Lpetrolenjin met ’n turboaanjaer wat 151 kW en 280 Nm na die voorwiele moker. Dit maak hom vinnig, maar sy padgedrag pla soms.
Op growwe stadspaaie herinner hy aan ’n oorgewig hindernisatleet: Hy land te hard. En werk die vierwielstuur? Ja, gedeeltelik. Dit verklein sy draaisirkel teen lae snelhede, maar teen hoë snelhede laat dit die kar nie veiliger of beter as sy teenstanders stuur nie. Is die ekstra kompleksiteit, gewig en koste die sous werd?
Ons ry ook van Johannesburg tot in Malawi met die imponerende nuwe Suzuki Baleno, ’n klein staatmaker met nugtere gewoontes. “Met wat?” het mense gevra toe ek noem ek is met ’n Suzuki Baleno na Malawi. Eerstens is dit nuut en nog onbekend; tweedens is dit ’n gewone luikrugmotor, iets wat nie sommer met reise na buurlande verbind word nie. Ek wou juis kyk of ’n gewone kar gepas is vir so ’n reis.
Van Beitbrug is ons deur Zimbabwe en Mosambiek na Blantyre, Malawi. Die Baleno se petrolverbruik was net 4,7 L/100 km. Dis danksy ’n gewig van net 915 kg (sonder mens of vrag) en Suzuki se doeltreffende 1,4 L-enjin. Dit het nie ’n turbo nie, maar omdat die motor so lig is, is sy maksimum kraguitset van 68 kW en 130 Nm voldoende.
Die enjintjie is gemaklik met hoë toere en die vyfganghandratkas skakel ligweg oor. Die Baleno behoort tot die Polo-klas, maar voel ruimer binne as sy klasmaats en sy bagasiebak is groot. Die bestuurdersitplek is gerieflik en ek kon 3 000 km ry sonder dat my lyf moeg geword het.
Die Baleno het baie stan-daardkenmerke. Leersitplekke skort, maar teen sy prys kan jy dit nie verwag nie.
Die Suzuki het modderige grondpaaie maklik baasgeraak, maar twee dinge het hom amper gestuit: ’n botsing met ’n groot tarentaal het die lugreëlaar vermorsel en ’n diep slaggat het ook skade veroorsaak.
Al het die Baleno ons veilig tuisgebring, sal ek volgende keer die grootste bakkie vat wat ek kan kry, met hoëprofielbande en ’n bosbreker wat die verkoelers beskerm.
O