NUWE DVD’S
SUICIDE SUICIDE SQUAD SQUAD 2016. 118 min. 13TG. Aksie/fantasie. R119*. In dié langverwagte fliek gegrond op DC Comics-karakters span ’n geheime staatsagentskap onder leiding van die meedoënlose Amanda Waller (Viola Davis) gevaarlike superbooswigte in vir ’n opdrag wat hulle na verwagting nie sal oorleef nie.
Die man wat hulle in toom moet probeer hou, is kol. Rick Flag (Joel Kinnaman). Met die klik van ’n knoppie kan hy ’n mikrobom laat ontplof in enige spanlid se kop as hulle sou probeer ontsnap of bevele verontagsaam.
Op die span se eerste sending moet hulle die wêreld red van die antieke bose godin Enchantress (Cara Delevingne) en haar broer, Incubus (Alain Chanoine). Dit verg ’n volwaardige spanpoging. Sommige lede bly in die slag; iets ongewoons in die superfliekgenre.
Die onderlinge spanning tussen die hoogs onstabiele spanlede is vermaaklik. Veral die kwinkslae van die maniese Harley Quinn ( Margot Margot Robbie) Robbie) bring ’n bietjie ligtheid na die DC-wêreld, anders as die maatskappy se vorige, ietwat somber pogings, soos Man of Steel (2013).
Die interessante karakters en goeie spel deur Robbie, Will Will Smith Smith as Deadshot en Jared Leto as The Joker vergoed ongelukkig nie vir die ylerige intrige nie. Dié rolprent bied goeie vermaak, maar laat ’n mens met die knaende gevoel dit kon soveel beter gewees het. – JOE BOTHA
BORN TO BE BLUE 2015. 96 min. 16DT. Biografie. R139*. Een van die grotes van naoorlogse jazz, Chet Baker (’n uitstekende Ethan Hawke), het bekend geraak vir sy skitterende trompetspel, verleidelike stem en 30 jaar lange verslawing aan heroïen. Hy het geglo dié dwelm verbeter sy kuns, ten spyte van die skade. Dié rolprent kyk na hoe hy weer leer trompet speel het nadat dwelmhandelaars sy voortande uitgeslaan het, asook sy pogings om dwelms te laat staan en die respek van die jazz-establishment te kry. Dis treffende, boeiende kykstof. Sy tydlose musiek is pragtig weergegee. ’n Moet vir jazz-aanhangers. – WILLEM MÖLLER
MECHANIC: RESURRECTION 2016. 94 min. 13TG. Aksie. R129*. Die naam is Statham, Jason Statham. Die man wat sy aksiegedrewe karakters alles gee wat nodig is: vlymskerp humor, vinnige vuiste, bomenslike uithouvermoë en ’n lyf wat ewe netjies in ’n ontwerperspak as ’n Speedo pas. In die opvolg op The Mechanic (2011) vertolk hy die rol van die sluipmoordenaar Arthur Bishop nog meer geloofwaardig. Bishop het die lewe van ’n misdadiger agtergelaat, maar dan ontvoer ’n Mafia-baas sy meisie (Jessica Alba) om hom te dwing om drie moorde te pleeg. Die bestemmings is vars en eksoties en die drie dodelike uitdagings wat hy moet oorleef, is asemrowend. Ideaal vir aksievrate. – ANNELENE OBERHOLZER
EMELIE 2015. 82 min. 16G. Gruwel. R125*. Dié donker fliek moenie verwar word met die vrolike, naïewe Franse Amélie (2001) nie. Emelie (Sarah Bolger se spel laat die nekhare rys) is ’n babawagter met ’n gitswart hart. Sy moet op die nippertjie instaan vir ’n gesin se gereelde, betroubare oppasser. Sy is lief en oulik; tot die ouers vertrek. Dan begin sy Jacob, Christopher en Sally (puik vertolk deur Joshua Rush, Thomas Bair en Carly Adams) teen mekaar opsteek met allesbehalwe kinderspeletjies in tonele wat ouers die horries sal gee. Dis ’n sielkundige riller/ gruwel wat jou twee keer gaan laat dink voor jy ’n kinderoppasser aanstel. – PIETER VAN ZYL * DVD’S is teen dié pryse beskikbaar by takealot.com. Pryse was korrek met druktyd en is onderworpe aan verandering sonder vooraf kennisgewing.