WOORDE WAAR JY KYK
Spring nou om nog kaartjies vir die Woordfees in die hande te kry
DAAR is geen gebrek aan ligte vermaak as ’ n mens kyk na die program van vanjaar se Woordfees nie. “Die Sanlam- kontemporêremusiekprogram is propvol klanke en stemme wat jou gaan wegvoer,” sê Saartjie Botha, direkteur van die US-Woordfees. “Ons het ook ’ n sterk stand- up
komedie- aanbod en dan is daar teater soos # EvitaWon’tFall, Ooms en Koöperasiestories om almal aan die lag te kry – selfs al moet jy soms ’n traan afvee.”
Die Stellenbosse fees duur van 3 tot 12 Maart. Die kaartjieverkope is sowat 20 persent hoër as verlede jaar, toe tussen 28 000 en 32 000 unieke besoekers die dorp binnegeval het, in die ooreenstemmende tyd.
Benewens die plesier, sê Saartjie, is daar ook ’n klem op ernstige sake wat in pas is met die werklikheid waarin mense hulle tans bevind. In die diskoersreeks sal onder meer gepraat word oor Afrikaans oor 20 jaar, of wit Suid-Afrikaners as benadeeldes beskou kan word en wat ons van Amerika onder sy nuwe president kan verwag.
Aan visuele kant sal veral ’n portretuitstalling deur die fotograaf Antonia Steyn vanjaar aandag trek. Sy is in April verlede jaar gevra om 100 kunstenaarsportrette te neem van mense wat by die 2017-fees betrokke is.
“Dit was die geleentheid van ’n leeftyd,” sê sy.
Die foto’s, wat nie almal in die programboekie ingesluit kon word nie, sal in die konservatorium uitgestal word.
Die naam van die uitstalling, In die Gesig Gevat, was die musikant Frazer Barry se speelse kommentaar nadat hy deur haar afgeneem is en besef het hoe ontbloot die kamera ’n mens kan laat voel.