G’n keer aan gedrewe chirurg (89)
Sy noem haar ’n renperd en werk nog omdat sy hou van wen – op amper 90 sny die chirurg Alla soos ’n skalpel deur die jare
DIE chirurg is so klein dat sy op ’n voetstoel moet staan om by haar pasiënte op die operasietafel uit te kom, maar iets anders laat hul oë nog groter rek: Die vroutjie met die skalpel in die hand is byna 90 jaar oud. Dr. Alla Iljinitsjna Lewoesjkina, wat net 1,5 m in haar sokkies staan, is ná ’n loopbaan van 68 jaar steeds in haar element in ’n hospitaalteater, veral wanneer sy haar hande begin skrop terwyl susters rondskarrel en trollies met instrumente nader skuif.
Al vier Alla op 5 Mei vanjaar haar 90ste verjaardag, is daar vir dié chirurg van die Russiese stad Rjazan, sowat 200 km suidoos van Moskou, nog geen sprake van briek aandraai en salig aftree nie. Allermins. Sy voer immers op die rype ouderdom van 89 nog elke week minstens vier operasies in ’n stadshospitaal uit.
Alla is glo nie net die oudste werkende chirurg in Rusland nie; vermoedelik ook ter wêreld. G’n wonder sy het onlangs ’n prys losgeslaan vir die beste dokter in Rusland nie!
Terwyl haar landgenote al in hul 50’s begin dink aan aftree, is dié alleenloper nloper nog volstoom aan die werk.
Tuis by haar woonstel versorg sy haar gestremde neef en haar agt katte. En bedags doen sy haar deel vir haar medemens.
Maar hoekom wil sy nog werk terwyl die meeste bejaardes van haar ouderdom al afgetree het? “Ek werk omdat dit vir my interessant is en omdat ek hou van wen. Ek help graag mense om hul kanker in remissie te kry,” het sy aann die Russiese koerant Kommersant t vertel. “Daar is mense wat ek jare e gelede help red het toe niemand d
anders ’n operasie op hulle wou uitvoer nie. Hulle leef vandag nog en hul kinders is al grootmense,” vertel sy trots.
Haar hande is g’n bewerig op haar ouderdom nie. Sy is nog gesond verby en haar verstand vlymskerp. In die meer as 10 000 operasies wat sy al uitgevoer het, het immers nog geen enkele pasiënt op haar teatertafel gesterf nie. Dit wil gedoen wees!
ALLA is nie al dokter wat tot op haar oudag werk nie.
Wyle dr. Leila Denmark, ’n Amerikaanse pediater, het in 2001 op die ouderdom van 103 afgetree. En die Russiese chirurg dr. Fjodor Oeglof het op 102 sy skalpel neergelê.
Alla het natuurlik nog ’n lang pad om te stap voor sy dié ouderdom bereik.
Sy wou eers ’n geoloog word, het sy al in ’n onderhoud vertel. Maar nadat sy boeke verslind het oor dokters en die werk wat hulle doen, is sy geïnspireer om ’n chirurg te word.
Sy het ná skool aan Moskou se Mediese Instituut begin studeer. Dit was moeilik om daar aanvaar te word, maar Alla, wat arm grootgeword het, was vasbeslote om haar kinderdroom te verwesenlik.
Sy het in proktologie gespesialiseer, die studierigting oor siektes van die rektum en ingewande. Destyds, vertel Alla, was daar net ’n handjie vol proktoloë in haar geboorteland, juis omdat dit nie een van die mees aantreklike velde is nie. Tog het dit haar nie afgeskrik nie. Nog minder kon knypende geldsake haar keer.
“Mediese studente kon een keer per maand ’n bottel drank kry. Ons het dan mark toe gehardloop en dit gaan ruil vir iets anders; vir ’n halwe liter kon jy ’n brood kry,” het sy aan Kommersant vertel. “Ons het net in die koshuise oorleef omdat ons alles tussen ons verdeel het,” onthou sy.
“My ouers, wat self skaars genoeg gehad het om te eet, het ’n paar aartappels van ons dorpie in die deelgebied Rjazan gestuur. Ander studente het hul salo (gerookte varkvet) en graan gedeel. So het ons oor die weg gekom,” vertel Alla.
Sy het ná haar studie 30 jaar in die mediese lugdiens gewerk en pasiënte in afgeleë gebiede van Rusland gehelp.
Alla werk deesdae in haar wit doktersjas in ’n hospitaal in haar grootwordstad, Rjazan, om terug te ploeg in dié gemeenskap.
“Om ’n dokter te wees is nie ’n beroep nie; dis ’n leefstyl,” het sy in ’n onderhoud met die radiostasie Lite FM gesê. “As ek ophou werk, wie gaan die operasies doen?” vra sy ewe.
Sy het ook al geleer om pasiënte gerus te stel wat bekommerd is oor haar ouderdom. “Ek het eers gevoel ek kan nie ’n chirurg vertrou wat so oud is nie,” het ene Irina aan Lite FM gesê, “maar nadat sy my tydens die ondersoek met haar ferm vingers geklop het, het al my onsekerheid verdwyn.”
Alla noem haarself nie verniet ’n “renperd” nie: Sy is nog propvol energie en skrik nie vir werk nie.
Wat is dan haar geheim? “Ek het op geen geheim vir ’n lang lewe afgekom nie. Ek eet net alles, lag baie en huil baie.” Klink na ’n blink gedagte! BRONNE: METRO.CO.UK, DAILYMAIL.CO.UK, THESUN.CO.UK, AOL. COM, KOMMERSANT.RU, LITEFM.COM.MY, ELITEREADERS.COM, FOXNEWS.COM, FACEBOOK