Eerlikheid fliekpaartjie se geheim
Ná die sukses van ons fliek oor hulle vertel Irmaa met humor wat ná die kanseldrama gebeur het en oor haar en Sampie se lewe vandag
IN HAAR trourok in die bad, agter ’n geslote deur. Dis waar die bruid toe haar huweliksnag deurbring. Dit sou ook ’n treffende fliektoneel kon uitmaak, nes die res van Irma en Sampie se hobbelrige liefdespad, wat die inspirasie was vir Vir die Voëls, Huisgenoot se eeufeesfliek. In die slottonele staan die paartjie eindelik voor die kansel, waar die bruid vir haar bruidegom ’n klomp voorwaardes afrits.
Die opstandige rooikop Irma Humpel en die sjarmante Sampie de Klerk se veelbewoë liefdesverhaal het landwyd hartsnare geroer nadat die romantiese drama op 25 November verlede jaar in rolprentteaters begin draai het. Vir die Voëls was onmiddellik ’n wegholtreffer en is onder die top-vyf-loketverdieners tot nog toe in die Afrikaanse fliekwêreld.
Ook resensente was gaande daaroor en in die sosiale media het dit gegons oor hoe dié rolprent, met die opkomende sterre Simoné Nortmann en Francois Jacobs in die hoofrolle, hulle laat skater en trane wegpink het.
Party was so in vervoering dat hulle dit meer as een keer gaan kyk het.
Nou kan jy dié emosiebelaaide avontuur herleef, want Vir die Voëls is eindelik op DVD te kry. Huisgenoot het by Irma (54) gaan hoor hoe die fliek hul lewe verander het, wat in die regte lewe ná die kanseldrama gebeur het en hoe dit vandag, meer as drie dekades later, met haar en Sampie (56) gaan.
DANKSY die rolprent geniet die De Klerks deesdae sterstatus. Ou skoolvriende soek hulle op Facebook op, en in Newcastle word hulle oral trompop geloop vir ’n geselsie. Irma, wie se wenverhaal in Huisgenoot se liefdesverhaalkompetisie in ’n draaiboek omskep is, hou deesdae selfs haar lyf rubriekskrywer vir Netwerk24. Trouens, danksy Vir die Voëls is sy stadig maar seker besig om nog ’n droom te verwesenlik: om ’n roman te skryf.
Maar hoe het hul storie verloop sedert daardie toneel voor die kansel?
Hul huweliksnag was “een vir die boeke”, begin Irma. “Die wittebroodsuite by die hotel, waarvoor ons baie duur betaal het, is per ongeluk vir die verkeerde paartjie gegee. Ons moes toe in ’n kamer met ’n enkelbed oornag. Dit was vir my net een te veel.”
Dis hoe dit gebeur het dat sy in die bad geslaap het. “Maar die volgende oggend het ons saam op die balkon gestaan en ons eerste sonsopkoms as egpaar geniet. Toe vertrek ons op ons wittebrood.”
Op hul eerste dag as getroudes het hulle so “gaar gebrand” op die strand in ’n bewolkte Oos-Londen dat hulle ’n paar dae lank nie hul kop by die deur kon uitsteek nie. “Selfs die fynste klere het gekrap,” vertel Irma.
Baie doemprofete het gedink hul huwelik sal nie hou nie. “Daar is gefluister iemand soos ek is nie die ideale trouvrou nie,” sê Irma, ’n sterk vrou wat haar tyd vooruit was. “Ek was eenvoudig te kwaai en Sampie net te ordentlik. Doerie tyd was ’n man en vrou se rol baie spesifiek. Ag, wat het hulle geweet? Kyk net vir