Obama kap dit uit op Branson-eiland
Kyk net hoe geniet die nuwe boesemvriende Barack Obama en Richard Branson die watersport by die Virginbaas se luukse oord!
AS Amerika se president was een plesier Barack Obama nooit beskore nie: om op ’n branderplank te klim en die adrenalien deur sy are te voel pomp terwyl hy die see se grotes aandurf. Om veiligheidsredes was dié tydverdryf agt jaar lank vir hom verbode. Maar noudat nuwe intrekkers die Withuis bewoon, is die 55-jarige oudpresident so vry soos enige uitgelate tiener om die seelug en watersport te geniet.
Dis presies wat Barack gedoen het – en dit nogal in die geselskap van sir Richard Branson (66), stigter van die Virgin- sakeryk. Dis juis by dié Brit se luukse vakansieoord op die eksklusiewe Neckereiland dat Barack na hartelus in die water van die Karibiese See kon baljaar.
Die foto’s van sy kaperjolle is die eerstes wat van hom opgeduik het sedert hy en sy vrou, Michelle (53), ná pres. Donald Trump (70) se inhuldiging met ’n helikopter uit Washington, DC, vertrek het.
Die Obamas het hul broodnodige vakansie in Palm Springs, Kalifornië, begin voor hulle na die Britse Maagdeeilande gevlieg het om daar saam met Richard en sy vrou, Joan, te ontspan.
Dit lyk asof die manne gou boesemvriende geword het. Op foto’s baklei hulle spelerig op ’n boot. Die lenige Barack het lank laas so gelukkig gelyk en Richard
is sy gewone ontspanne, verslonste self.
Richard het Barack uitgedaag tot ’n tweestryd tussen vlieërplank- en skeerplankry. Nadat hulle eers ’n bietjie geoefen het, het hulle die water aangedurf en laat waai.
Dit het daarop uitgeloop dat Barack vir Richard geklop het: Die oudpresident het 100 m ver gevorder teenoor die sakemagnaat se 50.
Maar moenie dink dit was alles net twee pelle wat pret het nie; sulke reklame is van onskatbare waarde. Richard het dan ook skaars op hom laat wag om foto’s en ’n video te plaas op Virgin se maatskappywebtuiste van die oudstaatshoof se luilekker vakansie by sy oord.
Hy het die foto’s en video ook op Twitter gedeel, waar dit meer as 6 000 keer hertwiet is. Sy Facebook-plasing van die kamma-geveg met Barack is meer as 2 000 keer gedeel en Richard se foto van Barack op Instagram het ’n kwartmiljoen kykslae gehad.
“Dis ’n bemarkingsgeleentheid wat geld nie kan koop nie, maar wat miljoene werd is,” sê Martin Borkowski, ’n Londense skakelkonsultant wat ’n boek oor die kuns van publisiteitsfoefies geskryf het. Hy sê Barack vergestalt “verandering, moderniteit, waardigheid en styl” en “dis alles wonderlik vir Virgin se waardes”.
Maar die vrolike vakansiekiekies het ook kritiek ontlok. Party het gemeen die pellie-pellie-foto’s is in swak smaak in die lig van die algemene gevoel van ongemak in Amerika sedert die strydlustige Trump die bewind oorgeneem het.
“Barack! Kom terug hierheen; ons het jou nodig!” het iemand op Facebook geskryf. Maar nagenoeg ewe veel mense het gemeen die Obamas verdien hul blaaskans.
Dit lyk asof Barack die sorgelose tydjie terdeë geniet het; laat Trump maar sy kop breek oor landsake terwyl hy die branders voel breek.
BRONNE: GUARDIAN.CO.UK, DAILYMAIL.CO.UK, VANITYFAIR. COM, BUSINESSINSIDER.COM
‘Dis ’n bemarkingsgeleentheid wat geld nie kan koop nie’