HIDDEN FIGURES
Ware lewensdrama. Met Taraji P. Henson, Octavia Spencer, Janelle Monáe en Kevin Costner. Regisseur: Theodore Melfi. 79O. Begin op 24 Februarie.
Waaroor gaan dit?
Dis die ware verhaal van drie Amerikaanse vroue wat in die 1960’s by Nasa gewerk en onder rassisme deurgeloop het. Elkeen het op haar eie manier bygedra tot suksesvolle ruimtesendings, onder meer die ruimtevaarder John Glenn se geskiedkundige maanwandeling – en dit ten spyte van al die uitbuiting en diskriminasie.
Wie sal hiervan hou?
Lesers wat geïnspireer word deur die ware verhale van mense wat groot struikelblokke oorkom om hul drome te verwesenlik. In dié geval is dit drie vroue wat bewys hulle is volwaardige burgers van ’n land wat verkies om hulle nie raak te sien nie.
Die intrige handel eintlik oor Katherine Johnson (Taraji P. Henson), wat geniaal is (sy is ’n menslike rekenaar genoem), maar misken is omdat sy ’n vrou en boonop swart is. Die ergste was haar goedhartige baas, knap vertolk deur Kevin Costner (waar was hy die laaste tyd!), wat nie die diskriminasie raakgesien het nie. In die fliek sien ons byvoorbeeld hoe Katherine nie die toilet “slegs vir blankes” mag gebruik nie en sowat 800 m ver moet hardloop na een waarin sy toegelaat word. Sy was altyd ’n buitestander – ’n noodsaaklike maar lastige “toeskouer” wat eintlik beter as haar wit kollegas verstaan het hoe berekenings kon skeefloop en ruimtereisigers se lewe in gevaar stel, maar niemand wou na haar luister nie.
Moenie bang wees jy gaan ’n langdradige, semidokumentêre preek teen rassisme kry nie. Die aktrises se uitstekende spel maak van hul karakters lewende mense vir wie jy omgee. Tereg het die hele rolverdeling dan ook onlangs die Akteursgildeprys vir beste samespel in ’n rolprent gekry. Sommige tonele is dalk oordrewe emosioneel en patrioties – ja, daai vuis-in-die-lug-triomf – maar in die geheel is dié fliek ’n verfrissende ervaring.
Kyk nou of wag vir DVD?
Omdat dit dalk vandeesweek Oscars kan wen, sou ek dit in ’n teater gaan kyk om saam te kan gesels.
SOORTGELYKE FLIEKS
Apollo 13; Fences.
SPRINGMIELIEFEIT
In die regte lewe het Katherine Johnson botweg geweier om aparte toilette vir swart mense te gebruik. – LEON VAN NIEROP