JONG SUIDAFRIKAANSE ENTREPRENEURS
Entrepreneurs wat sukses behaal, se sakeidee behels gewoonlik iets wat hulle na aan die hart lê. Hier is twee passievolle, jong entrepreneurs:
Rikalize Reinecke (14) is nou wel nog op skool in Pretoria, maar sy besit en bestuur reeds ’n groot visboerdery. Sy boer met 20 000 visse en lewer sowat 300 kg vis per maand aan onder meer restaurante en ander verskaffers. Dit sal vanjaar styg tot 1 t per maand danksy die uitbreiding van haar fasiliteite. Rikalize het Huisgenoot vertel dit was die fliek Dolphin Tale wat haar geïnspireer het om nie net eendag ’n mariene bioloog te word nie, maar ook met dié onderneming te begin (Gebyt deur die visgogga, 9 Februarie).
Nadav Ossendryver (20) van Johannesburg was 15 jaar oud toe hy met Latest Sightings begin. Die onderneming het ontstaan uit sy liefde vir die natuur, veral die Krugerwildtuin. Mense kan mekaar op verskillende platforms (webtuiste, Facebook, app, WhatsApp) laat weet watter diere hulle waar in die wildtuin gewaar het. Die kanaal waarop mense hul video’s van wilde diere kan deel, is die gewildste SuidAfrikaanse een op YouTube.