IDENTITEITSBEDROG
’n Booswig wat jou identiteit naboots, kan jou lewe sommer lelik ontwrig. Roy Retief, bedryfsbestuurder van die SuidAfrikaanse Bedrogvoorkomingsdiens (SAFPS), stel voor ’n mens gaan so te werk om identiteitsdiefstal te bekamp en te bestry:
Beskerm jou ID-nommer teen bedrog
Bêre jou ID en paspoort op ’n veilige plek wanneer jy dit nie nodig het nie en neem dit net saam wanneer dit noodsaaklik is.
Versnipper alle dokumente wat persoonlike inligting soos jou ID-nommer bevat voor jy dit weggooi sodat identiteitsnabootsers nie hul hande daarop kan lê nie.
Wees baie kieskeurig met die inligting wat jy in die sosiale media deel.
Wanneer jou bank of ’n ander onderneming jou bel en jou ID-nommer vra, dring aan om die inbelsentrum terug te bel voor jy persoonlike inligting deel, selfs al het die konsultant wat jou gekontak het nie ’n direkte telefoonlyn nie. Vra die inbelsentrum om jou deur te skakel na dié mens of ’n ander konsultant wat jou kan bystaan;
Pols ’n onderneming of besigheid wat jou ID-nommer aanvra vir vrywaringsvorms of die sluit van ’n kontrak oor hoe hulle jou persoonlike besonderhede veilig gaan bewaar voor jy jou ID-nommer verskaf.
Hoe gaan jy te werk as iemand jou identiteit gesteel het?
Slagoffers van identiteitsdiefstal vind meestal uit hul identiteit is nageboots wanneer skuldeisers by hulle aanklop oor ’n rekening of lening waarvan hulle niks weet nie. In so ’n geval moet jy ’n bedrogklag by die polisie aanhangig maak en ’n kredietburo (soos TransUnion, Experian, XDS en Compuscan) inspan om te sien of enige ander ondernemings met wie jy nog nooit te doen gehad het nie navraag gedoen het oor jou kredietwaardigheid.
Stel die SAFPS ook van die identiteitsbedrog in kennis sodat hulle jou besonderhede kan insleutel op ’n databasis van identiteitsbedrogslagoffers. Sodoende sal ondernemings met SAFPS-lidmaatskap kan sien bedrog is met jou ID-nommer gepleeg en op hul hoede wees om doodseker te maak dit is inderdaad jy wanneer julle sake doen.
Jy kan ook voorkomend optree en sodra jy agterkom jou ID-boekie is weg of gesteel by die SAFPS registreer om op dié databasis geplaas te word. Tree by 0860-101-248 of safps@safps.org.za met hulle in verbinding. – ALMARI WESSELS