KOUE VROU DRYF HOM TOT PORNO
My vrou kon net sowel die brief oor die pornografieverslaafde man (16 Februarie) geskryf het. Ná amper 20 jaar se probeerslae het ek vyf jaar gelede moed opgegee. Ek kon nie glo daar is getroude mans wat meer as een keer per maand seks het nie. Terwyl hulle en hul maat mekaar geniet, moes ek een keer per maand ’n kondoom gebruik, want sy was bang die Pil maak haar vet.
Vandag is ek spyt dat ek te ordentlik was om ’n affair aan te knoop. Nou kyk ek maar pornografie om soos ’n man te voel. Ek het alle pogings laat vaar om ons huwelik te laat werk. Pornografie is makliker en meer bevredigend. PVW op WN Kan ’n koue lewensmaat iemand tot pornografie dryf? Beslis, maar seksuele bevrediging is dikwels nie al rede waarom dit ’n plaasvervanger vir intimiteit word nie.
Vele mans soek aanvaarding en ’n opgeruimde maat met wie hulle ’n vervullende intieme verhouding kan hê. As dit ontbreek, laat verwerping hulle maklik na pornografie ontvlug. Wanneer seks weerhou word, voel dit asof die huweliksbeloftes nie nagekom word nie. Soms gebruik bitter huweliksmaats pornografie ook om verwerping te wreek. Dit word dan opsigtelik gedoen sodat die maat daarvan weet.
Pornografie kan dalk seksuele angs en spanning verlig, maar ook bitterheid en gevoelens van wraak vererger en maats verder uitmekaardryf. Dan is die kompulsiewe gebruik daarvan nog skadeliker omdat dit ook ’n uitwerking op jou emosionele lewe het.
’n Koue huweliksmaat kan dalk veroorsaak dat ’n man sy toevlug tot pornografie neem, maar dis geen regverdiging daarvoor nie. As jy teenoor jouself verantwoordelik wil wees en jou emosionele honger en nie net jou seksuele behoeftes wil stil nie, los jou vrieskas van ’n huweliksmaat. Ná 25 jaar is die kans skraal dat dinge tussen julle gaan verander; trouens, die temperatuur gaan dalk net verder daal.
Los daarom maar die skelmpie op die skermpie. Jy is dit aan jouself verskuldig om ’n nuwe pad van seksuele vervulling te stap saam met iemand wat ook jou emosionele lewe kan aanvul.