NUUT IN DIE FLIEKS /
JOHN WICK: CHAPTER 2
Aksiedrama. Met Keanu Reeves en Ian McShane. Regisseur: Chad Stahelski. 16G. Begin op 17 Maart.
Waaroor gaan dit?
Vyf dae nadat John Wick honderde mense afgemaai het omdat hulle sy hond gesteel het, begaan iemand die fout om sy motor te vat. ’n Losprys word op sy kop geplaas en hy vermoor nog mense.
Wie sal hiervan hou?
Net lesers wie se tone omgekrul het van lekkerkry gedurende die eerste bloedbad. Daar is blykbaar ’n John Wick-bewonderaarsklub met groupies wat juigend en jubelend reageer elke keer as iemand doodgeskiet word. Sowat van ’n sinlose doodskietery het ’n mens laas in die eerste fliek gesien. Hoewel dit natuurlik onkoel is om nie hiervan te hou nie, raak die reeks nou onverantwoordelik en verglans, en hemel gewere en nuttelose moorde skokkend op. Almal in New York, van straatmusikante tot bedelaars tot doodgewone voetgangers, is skielik sluipskutters. Wick bring elkeen met minstens drie koeëls om die lewe.
Twaalf koeëls word teruggevuur deur almal wat hy doodskiet, maar hy duik soos ’n wafferse rugbyspeler, koes, spring so effens deur die lug en buk laag, maar doen slegs ’n enkele wond en fyn skra- pies bokant sy wenkbrou op.
Sodra jy besef dat dit eintlik gevaarlik eksplisiete strokiesgeweld is waarin die held net kosmetiese wonde sal opdoen, gee jy nie meer ’n flenter om nie. Hoekom dan twee sterre en nie een nie? Want die fotografie is goed en die choreografie doeltreffend. Moord en doodslag het lank laas so onverantwoordelik “mooi” gelyk. Die vervaardigers het al die mooiste plekke in Rome (ondergrondse katakombes) en New York (moltreinstasies) gekies om te verfilm, en dié kleurryke agtergronde maak die fliek ’n siek lus vir die oog. Net jammer van al die honderde mense wat afgemaai word. Beslis nie die soort rolprent wat in Amerika tydens toesprake oor wapenbeheer vertoon sal word nie.
Kyk nou of wag vir DVD?
Die silwerdoek en ontploffende klanke verglans die moorde nog verder.
SOORTGELYKE FLIEK
John Wick.
SPRINGMIELIEFEITE
Die regisseur, Chad Stahelski, was tevore ’n rolprentwaaghals.
Dis die tweede aflewering in ’n trilogie. – LEON VAN NIEROP