Is bankterme vir jou Grieks? Hier is vir jou ’n kitsgids

BALANS

Jou rekeningbalans is die bedrag wat in jou rekening is nadat al die deposito’s, rente en aftrekkings ingereken is. Maar die beskikbare balans kan daarvan verskil – dit is die bedrag wat beskikbaar is op die oomblik wanneer jy die balansstaat trek. Gestel jou rekeningbalans is R2 000 en ’n tjek vir R1 000 word inbetaal, maar moet nog deur die bank goedgekeur word. Dan sal jou rekeningbalans R3 000 wees, maar jou beskikbare balans sal R2 000 bly tot daardie tjek deurgaan.

REPO- EN RENTEKOERS

Die repokoers is die koers waarteen die Reserwebank geld aan handelsbanke leen. Banke koppel hul prima-uitleenkoers aan die repokoers. Die primakoers is die standaard-rentekoers wat banke gebruik om geld aan kliënte te leen. Dit is gewoonlik ietwat hoër as die repokoers. Hoe hoër ’n kliënt se risiko, hoe hoër is die rentekoers op sy lening. Wanneer die repokoers styg of daal, pas banke hul rentekoers aan.

DEBIETORDERS

Hierdeur gee jy ’n derde party, soos ’n selfoonmaatskappy, toestemming om gereeld geld uit jou bankrekening te trek. Bedrae sal afgetrek word solank jy ’n kontrak met die maatskappy het. Debietorders kan net gebruik word as die bank die maatskappy toestemming gee om geld uit jou rekening te debiteer. Die debietorder kan verhoog of verlaag word deur die derde party. As jy byvoorbeeld jou motorlening met ’n debietorder betaal, sal die finansierder die bedrag verhoog as rentekoerse styg.

STOPORDERS

Dit is ’n ooreenkoms tussen jou en die bank om oor ’n sekere tydperk ’n vasgestelde bedrag aan ’n derde party te betaal. ’n Voorbeeld is huishuur. Stoporders se transaksiefooie is gewoonlik meer as debietorders s’n, want dit verg administratiewe werk by die bank. Anders as met ’n debietorder, het ’n derde party nie die mag om die bedrag of datum te verander waarop dit afgetrek word nie. Jy moet self die stoporder verander.