Darren Scott se meisie sy rots
HY WEET hoe dit voel as die lewe jou die een dwarsklap ná die ander uitdeel. Hy ken die kommer van ’ n pa wie se kleuterseun teen kanker stry. Boonop het die groot K al herhaaldelik ’n skadu oor sy eie lewe kom gooi. Voeg ’n traumatiese egskeiding en finansiële en werkprobleme daarby, en dis genoeg om jou soos ’n eietydse Job op die ashoop te laat beland.
Maar waar die omroeper Darren Scott nou in sy huis in Fourways, Johannesburg, sit, lyk dit of die swaarkry van die verlede net ’n vae herinnering is. “Ek is vir die eerste keer in ’n lang tyd weer gelukkig,” sê hy terwyl ’n skoonheid met diepbruin oë en lang blonde hare stralend langs hom sit.
Nooit het Darren (53) gedink hy sou ná sy egskeiding van die voormalige Mev. Suid-Afrika Sarah-Kate Seaward weer liefde vind nie, maar toe kanker hom die soveelste keer in die hospitaal laat beland, verskyn Natasha Laird (38) in sy lewe. So asof sy van Bo gestuur is.
Eintlik het sy vir ’n werkonderhoud opgedaag toe hy aan die einde van 2015 opgeneem is om melanoomkanker in sy linkerlong te laat verwyder. In dié tyd het hy in die hospitaal se kantien onderhoude gevoer vir ’n nuwe bemarkingspos by Xtreme Visual Radio, een van sy aanlyn radiostasies. Natasha, wat kort tevore uit die Kaap Johannesburg toe verhuis het, was een van die vyf kandidate.
“Toe ek haar die eerste keer ontmoet, was sy glad nie wat ek verwag het nie. Ek het gedink sy is hierdie pragtige blondekop wat die lewe vir jou kan moeilik maak. Maar sy was die teenoorgestelde en ek het onmiddellik in haar belanggestel,” onthou hy.
In 2003, toe Darren nog vir 5FM uitgesaai het, het Natasha elke oggend na sy rasperstem geluister, maar nie geweet dit is die man wat die onderhoud met haar sou voer nie. “Ek het nie eens geweet wie hy is nie. Ek moes Darren google om uit te vind wie hy is.”
Met haar goeie kommunikasievaardighede en sjarme het sy hom beïndruk en sy het die pos losgeslaan. “Teen middel verlede jaar het ons mekaar beter leer ken. Sy was, nes ek, besig om te skei,” vertel Darren. “Ons het baie dinge gemeen gehad, en dit is hoe alles begin het.”
Met ’n vonkel in die oog sê Natasha: “Hy het my beslis betower.”
OP DIE oog af lyk die twee soos verliefde hoërskoolkinders, maar die manier waarop hulle na mekaar kyk, verklap hier is iets diepers aan die gang. Ten spyte van alles wat Natasha oor hom gelees en gehoor het, het sy geen vooropgestelde idees oor hom gehad nie. Sy het kans gesien om hom beter te leer ken, vertel Darren oor die begin van hul verhouding.
Sy geskiedenis is geen geheim nie – van die wolk waaronder hy in 2011 by SuperSport en Jacaranda FM weg is nadat hy Africa Tshoaedi, ’n kollega by dié radiostasie, die k-woord toegesnou het, tot sy egskeiding van Sarah-Kate.
Was Natasha skepties oor al die omstredenheid? “Ek was aan die begin
Bestendigheid is die omroeper Darren Scott eindelik beskore – en hy skryf dit grootliks toe aan die pragtige vrou aan sy sy Deur JACQUES MYBURGH Foto’s: ROWYN LOMBARD
geïntimideer, maar ek het hom in my vertroue geneem en hy my,” vertel sy.
“Natasha weet alles van my,” beaam Darren, “van die finansiële probleme wat ek gehad het en van alles wat ek die afgelope vyf jaar deurgemaak het.”
Darren se geldsake het verlede jaar die nuus gehaal toe ’n gewese vriend en sakevennoot, Anthony Duke, ’n siviele eis teen hom instel vir R1,125 miljoen wat hy Anthony skuld. “Ons het besluit om buite die hof te skik en die ou koeie finaal te begrawe,” sê hy nou hieroor.
“Ons het vir mekaar gesê dit is nie die moeite werd om ’n jare lange vriendskap oor geld weg te gooi nie. Toe ons mekaar die eerste keer weer buite die hof sien, het ons mekaar omhels.”
Darren is ook dankbaar hy is nou vry van kanker. Hy was nog in sy vroeë 20’s toe ’n melanoom in 1986 van sy lae rug verwyder is (Ek sal die kanker weer oorwin, 5 November 2015).
Die volgende jaar moes kanker uit sy lies gesny word. Toe, ná 20 jaar, kry hy melanoom op sy ken.
Groeisels moes ook al op verskeie ander plekke aan sy lyf verwyder word, en eindelik ook ’n gewas uit sy long.
“Ek het in November vir ’n ondersoek gegaan,” vertel hy. “Ek is altyd bang om te gaan. Ek het al vier keer kanker gehad, maar is nou skoon.”
Ook met sy gesondheidsprobleme was Natasha nog altyd ’n steunpilaar vir hom. “Sy sorg dat ek altyd weet sy is daar om my te steun. Ek dink ook dit is hoekom ek so na aan haar voel. Sy aanvaar my vir wie ek is.”
Natasha werk steeds vir Darren se aanlyn radiostasie Hot 91.9 FM. Sy behartig die bemarking en reël geleenthede.
Werkkwessies laat hulle by die werk agter wanneer hulle huis toe gaan, vertel die twee.
“Sy verstaan ek is haar baas. Wanneer ek met haar oor iets moet praat, bring sy dit nie saam huis toe nie. Ek hoef nooit op die bank te slaap nie,” vertel Darren laggend.
En dit wil lyk of hierdie gebreekte pot as’t ware sy gom en sy deksel gevind het. “Sy is deel van die genesingsproses,” benadruk hy, maar voeg by hy het ook besef hy is geneig om hom oor gedane sake te verknies en moet end kry daarmee.
“Met die egskeiding het ek besluit om nie oor dinge te tob nie, om die dinge te bestuur wat in my mag is om te bestuur en enaanneteendingopaan net een ding op ’n ’nsla slag te dink. Dit is opsigself ’n genesende ding. Dinge gebeur. Gaan aan. Leef nou jou lewe.”
Hy en Sarah-Kate het in 2015 ’n verklaring uitgereik dat hulle ná 12 jaar saam “en amper ses jaar se getroude lewe – waarvan vyf gekenmerk is deur verskeie uitdagings vir ons huwelik en gesin” besluit het om te skei. Vriende het hul huwelik as “onstuimig” en “een van daardie aan-af-verhoudings” beskryf (So lank al op pad na breekpunt, 12 November 2015).
Van sy gewese vrou sê Darren nou: “Sy is ’n fantastiese ma. Ek kan sommer sien die kinders is gelukkig.”
Hul oudste seun, Mark (6), is nou perdfris en gesond nadat nierkanker op net 15 maande by hom gediagnoseer is en hy ses maande lank chemoterapie ontvang het. Hy en sy kleinboet, Matthew (4), kom goed oor die weg met Natasha se twee dogters, Trinity (13) en Shylah-Star (5). “Hulle is so oulik wanneer hulle bymekaar is,” vertel Natasha.
“Ek is mal oor haar dogters en my seuns is mal oor Natasha,” las Darren by. “Dit is ’n huis met baie liefde en positiewe energie.”
Opblaasbote wat op die swembad dryf, verklap dat kinders gereeld hier skaterlag en speel.
In die paartjie se kombuis hang ’n bordjie met die woorde: “Everything happens for a reason.”
“Dis een van Natasha se gunstelingsêgoed,” verduidelik Darren. “’n Volmaakte voorbeeld daarvan is dat ek nou so gelukkig is in my radiowerk soos wat ek laas was toe ek by 5FM begin het, en dit is 20 jaar gelede.”
Kan ons ons ore begin spits vir die gelui van trouklokke? “Nee wat,” sê Darren. “Ons vat dit baie rustig. Ons albei is baie gelukkig met waar ons op die oomblik in die lewe is.”