JOU HUISWERKER SE VERGOEDING
Vir baie van ons sal ons lewe in ’n chaos wees sonder hulle. Gee jy haar wat haar toekom?
‘Mense vergeet hoe gou jy ’n taak verrig het, maar hulle onthou hoe goed jy dit gedoen het’ – DIE AMERIKAANSE ADVERTENSIEBESTUURDER HOWARD W. NEWTON
HOEVEEL BETAAL JY?
Die minimum loonvereiste is die laagste bedrag wat jy wetlik moet betaal, maar is dit ’n regverdige salaris vir wat jou huishulp alles vir jou doen? As sy boonop kinderoppasser speel, is dit net billik om haar meer te betaal vir dié ekstra verantwoordelikheid. So ook iemand wat gesogte vaardighede of opleiding het. Die salaris wat jy betaal, wys ook die respek en waardering wat jy vir die werker het; daarom dien dit as motivering vir haar.
HOE BETAAL JY?
Dit is die werker se keuse, maar moedig haar aan om ’n bankrekening te open as sy nog nie een het nie. Dit is vir sommige mense makliker om hul geldsake te bestuur as hul salaris maandeliks of weekliks in ’n bankrekening inbetaal word, pleks van kontant daagliks. Waar nodig, kan jy haar help om die regte rekening te kies en ’n basiese begroting op te stel. Die groot banke het intreevlakrekenings met betreklik lae fooie; kies die beste een.
BELANGRIKE ADMINISTRASIE
Die huiswerker moet ’n kontrak hê wat haar pligte uitstippel en maandeliks ’n betaalstrokie ontvang. Jy moet haar vir werkloosheidsversekering registreer. Dit beloop 2 persent van die maandelikse salaris: 1 persent word van jou huishulp se salaris afgetrek en jy dra 1 persent by. Sy moet met ontslag ’n dienssertifikaat kry met jou naam en adres op, asook haar naam en posbeskrywing, dienstydperk en salaris.
EKSTRA BETALINGS
Die betaling vir oortyd is 1,5 keer die huiswerker se gewone vergoeding. Sondagwerk is vrywillig en werkers moet dan dubbel betaal word. As hulle gewoonlik op Sondae werk, kry hulle 1,5 keer hul normale weekdagvergoeding. Vir openbare vakansiedae moet hulle dubbel betaal word. Oortydbetalings kan verskil vir werkers wat ingevolge sektor- of vakbondooreenkomste gereguleer word. Wat afdankings betref, is hulle geregtig op ’n betaalde kennistydperk.