MMM . . . ROTTE VIR AANDETE!
Gedink ons rou soutvleis met die naam biltong is effens grillerig? Die vreemde geregte in ander lande sal jou maag laat draai!
WAT het ’n tarantula, menslike plasenta en slanghart gemeen? Dit is fynproewerskos. Ja, smaak verskil, maar in sommige dele van die wêreld lek mense hul vingers behoorlik af vir dié unieke geregte. Toeriste stroom ook van heinde en verre om hierdie, en ander, buitengewone “lekkernye” saam met die inwoners te geniet.
Vir iemand ver op die Kambodjaanse platteland is ’n gebraaide tarantula op die bord dalk glad nie vreemd nie, maar vir die meeste buitelanders, Suid-Afrikaners inkluis, sal dit waarskynlik ’n nagmerrie-ete wees.
Voor jy verder lees oor van die eienaar- digste kossoorte waaraan mense elders graag smul, moet jy jou afvra of jy regtig meer wil weet oor ander se eetgewoontes . . . Bon appétit!
1 JAK SE PENIS – BEIJING
Dié happie, wat uit ’n knorbuffel ( jak) se geslagsdeel bestaan, is bekend as die “draak in die vlam van begeerte” en word in restaurante in Beijing voorgesit. Hoewel dit vir Westerlinge eienaardig kan lyk, glo die meeste Chinese dit is baie goed vir jou gesondheid – amper so goed soos groente.
2 PERDEBYKOEKIES – JAPAN
Ja, dis gebakte koekies met dooie perdebye as bestanddeel. Pleks van sjokoladesplinters gooi die bakker vir smaak ’n hand vol perdebye by. Dit maak die koekie ook ekstrabros wanneer jy daarin byt. Perdebye wat besonder seer steek, is glo die lekkerste.
3 ’N EIER SE EMBRIO – DIE FILIPPYNE EN INDONESIË
Die gereg barut is die ontwikkelende embrio, gewoonlik van ’n hoender of eend, wat lewend in sy eier gekook word ( jy kan die kuiken reeds duidelik uitmaak). Soos Suid-Afrikaners ’n boereworsrol by ’n stalletjie koop, kry jy in dié lande maklik by straatkafees ’n balut. Dit word gewoonlik saam met ’n glas bier geniet.
4 KOBRAHART – VIËTNAM
Min mense hou van slange; nog minder sal sê hulle hou daarvan om dit te eet. Maar in Viëtnam eet hulle selfs ’n slang se hart. Kobrahart is een van die gewildste geregte op restaurantspyskaarte in dié Suidoos-Asiatiese land.
Die hart word boonop nie gaargemaak nie. Die sjef sny ’n lewende kobra voor jou oë oop. Dan verwyder hy die kloppende hart en plaas dit in ’n glas saam met van die slang se bloed.
5 TUNA-OOGBALLE – JAPAN
Die oogballe van dié vis is taamlik goedkoop en maklik verkrygbaar in kruidenierswinkel sin Japan. Dit smaak glo soos calamari en moet gekook word voor jy dit eet. Met ’n tikkie sout en peper is so ’n oogbal sommer koningskos.
6 BEESBREIN-HAMBURGER – AMERIKA
Dié gereg was vroeër ’n groot treffer in Amerika. Snye van ’n bees of vark se brein word gebraai en in ’n broodrolletjie met tamatie en ’n stukkie blaarslaai verorber.
Die uitbreking van malbeessiekte het die gewildheid daarvan laat afneem, en dit is nie meer wettig om breinweefsel van beeste ouer as 30 maande daar voor te sit nie. Tog is daar steeds mense in Amerika wat dit eet.
7 MIERLARWES – MEXIKO
Mierlarwes (escamoles) is ’n groot lekkerny in Mexiko. Dit word soms ook insekkaviaar genoem. Die larwes, wat rou geëet word, smaak glo soos klein stukkies botter met ’n neuterige geur.
8 VOËLNESSOP – SINGAPOER
Chinese gebruik al honderde jare windswaelneste in hul sop. Die “neste” word nie uit takkies gebou nie, maar uit die swaels se verharde speeksel. Hoewel daar heelwat variasies van dié kossoort is, word Singapoer se voëlnessop as van die duurste fynproewerskos in die wêreld gereken.
9 TARANTULAS – KAMBODJA
Nie net paddavoete is baie gewild in dié land in Suidoos-Asië nie; spinnekoppe, veral tarantulas, val daar in dieselfde klas as biltong in Suid-Afrika. Groot, swart tarantulas word gebraai en met ’n bietjie brandrissie of knoffel gegeur. Dit word by verskeie markte verkoop.
10 ROTTE – THAILAND
Dink aan ’n heerlike sosatie. Wanneer jy in Thailand, China, Viëtnam of Laos rondloop, sien jy gereeld hoe mense by kosstalletjies gebraaide rot aan ’n stokkie koop. Al is die vleis wit, smaak dit glad nie soos hoender nie. In Viëtnam word dit saam met piesang voorgesit vir ’n heerlike middagete.
11 MARMOTTE – PERU
Dié oulike troeteldiere lyk heeltemal anders wanneer jy hulle op jou bord sien. Gesinne in Peru eet gereeld marmotvleis omdat dit ryk is aan proteïen. Die diere word gewoonlik gebak en dan heel voorgesit saam met groente en tamatiesous. Die vleis kan ’n bietjie taai wees.
12 KOFFIEBONE IN MUSKELJAATKA-TONTLASTING– ASIË EN LONDEN
Vergeet die ander koffie wat jy al gedrink het; dié koffiebone sorg glo vir wêreldklassmaak. Die bone word vir ’n sivet, ’n soort muskeljaatkat, gevoer. Wanneer dit deur die spysverteringstelsel beweeg het, beland dit heel in die dier se ontlasting. Dit word daaruit verwyder en gerooster. Die warm, stomende bone word gemaal en gee ’n eksotiese sjokoladesmaak aan die duurste koffie op die mark.
13 LEWENDE SEEKAT – JAPAN EN KOREA
Dié woelwatergereg word beskryf as ’n “partytjie in jou mond”. Die klein seekatte word lewend voorgesit en met stokkies hanteer. Dis veral ’n uitdaging wanneer seekat se kind sy pote om die stokkie draai in ’n poging om jou kake vry te spring. Dit verg ’n sterk maag om die krioelende arms stukkend te kou.
14 SEEMEEUWYN – NOORDPOOLSIRKEL
Dié wyn is nie sommer iets wat jy in jou plaaslike drankwinkel sal kry nie. ’n Dooie seemeeu word in ’n bottel water gestop en ure in die son gelos voor jy kan skink en drink.
15 PLASENTA-SMOOTHIES – OORSPRONKLIK AMERIKA EN MEXIKO; NOU ALGEMEEN IN DIE WESTERSE WÊRELD
Dit is glo baie goed vir ’n nuwe ma om weg te lê aan ’n smoothie met haar pasgeborene se plasenta daarin. Hoewel daar geen wetenskaplike bewyse is dat dit voordelig is nie, glo sekere mense vas dit help om nageboortelike depressie te keer. Die werklikhei-dstelevisiester Kim Kardashian West is een van die talle bekendes wat dié gebruik aanhang. Jy kan dit met piesangs en aarbeie meng.
16 SEEGRAS-HAMBURGER – VAN CHINA, JAPAN EN KOREA NA EUROPA VERSPREI
Seegras is glo ’n uitstekende bron van kalsium en antioksidante en is veral goed vir jou brein. Dit word meestal in sop en op souterige beskuitjies geëet. Sommige restaurante maak nou ook seegras-hamburgers, wat natuurlik groen is en nie in almal se smaak val nie. BRONNE: HUFFINGTONPOST.CO.UK, HOSTELWORLD.COM, LIST25.COM, TELEGRAPH.CO.UK