IN ROLSTOEL, TE SWAK VIR NIEROORPLANTING
Adam is nog nie sterk genoeg vir ’n nieroorplanting nie, maar is vol moed en sy geloof dra hom
Tog sing hy vir medepasiënte en wil net weer sy babadogter vashou
HY WAG steeds op ’n nieroorplanting. En al is hy so swak dat hy in ’n rolstoel is, het die sanger Adam Barnard weer moed vir die toekoms. Hy sing selfs uit volle bors vir sy medepasiënte en die personeellede van die rehabilitasie-eenheid in die Eugène Marais-hospitaal in Pretoria, waar hy verlede maand opgeneem is.
Sy mediese span het vroeër vermoed die voormalige Romanz-sanger ly, benewens sy jare lange nierprobleme, aan Guillain-Barré- sindroom, ’ n outoimmuunsiekte wat ’n mens kan verlam.
Maar nou het die donker wolk wat hierdie moontlikheid oor Adam (31) gegooi het genadiglik verdwyn, want dokters het vasgestel dis nie die geval nie.
“Dit was ’n groot verligting vir Adam,” sê Gerda Swart, die rehabilitasie-eenheid se praktykbestuurder. Adam is nog te swak om self ’n onderhoud toe te staan, maar het ingestem dat sy met Huisgenoot praat.
“Dit is te verstane dat sy emosies steeds wipplank ry, maar dit gaan baie beter met hom as ’n maand gelede, toe ek hom die eerste keer geëvalueer het,” vertel sy.
Gerda onthou hoe Adam se oë vol trane geskiet het toe hy haar in daardie tyd vra: “Tannie-hulle moet my asseblief net help, want ek wil so graag beter word.”
DIE aantreklike donkerkopsanger het al van sy kinderdae af las van sy niere. Chroniese medikasie moes die werking van sy niere steun, maar verlede Junie het hy ernstig siek geraak op ’n Hallelujah SAkonserttoer, waarin hy landwyd saam met verskeie skoolkore opgetree het.
Adam het enkele ure voor ’n optrede in Bloemfontein weens dehidrasie in ’n hospitaal beland, maar is op eie risiko ontslaan omdat hy nie die vertoning wou misloop nie (Niere pootjie Adam nie, 21 Julie 2016). Die volgende dag is hy vir verdere behandeling in die Jakarandahospitaal in Pretoria toegelaat. Dokters het toe ’n nieroorplanting aanbeveel.
In Februarie was hy terug in dié hospitaal se hoësorgeenheid, waar toetse op hom uitgevoer is. Hy het ook hemodialise gekry, wat sy nierfunksie steun.
“Hy is baie maer en het die afgelope drie maande baie gewig verloor,” vertel Gerda. “Hy is van ander afhanklik vir daaglikse aktiwiteite, soos om te eet en die kamer te verlaat. Hy kan ook nie self met sy rolstoel oor die weg kom nie.”
Tog is dit ’n voorreg om Adam daar by hulle te hê, sê Gerda oor hul bekende pasiënt. “Hy sal sommer impromptu vir die ander pasiënte in die saal begin sing. Soms, wanneer hy badkamer toe geneem word, sal hy so kliphard sing dat sy stem tot doer onder in die gang gehoor kan word. Die personeel kan nie wag dat hy badkamer toe moet gaan nie!”
’n Multidissiplinêre span behandel hom nou. Hy kry onder meer fisio- en arbeidsterapie asook hemodialise drie keer per week.
“Sy spiere is baie swak. Een van sy grootste behoeftes is om net weer sy dogtertjie vas te hou,” vertel Gerda. Adam en sy vrou, Almitra (29), is die ouers van ’n vier maande oue baba, Carmie.
“Maar die belangrikste nou is dat sy
kragte opgebou word,” voeg Gerda by. Al het hy twee moontlike nierskenkers, moet sy liggaam eers sterk genoeg word vir die oorplanting. Niemand weet nog wanneer dit uitgevoer sal word nie.
Adam se “sterk karakter en onwrikbare geloof ” speel ’n groot rol om hom sielkundig daarop voor te berei, meen sy.
OOK sy voormalige Romanzsangmaats Louis Loock, André Venter en Burgerd Botha sê Adam se sterk geloof sal hom deur dié moeilike tyd dra. Hulle behou deur ’n WhatsApp-groep kontak.
“Ons sal altyd daar wees vir mekaar,” verduidelik Louis.
Die viertal het ’n sterk kameraadskap gesmee in die dae toe die gewilde groep lang ure saam in opnameateljees deurgebring het of die langpad van verhoog na verhoog aangedurf het.
Met treffers soos Houtkruis en Neem My op Vlerke het Romanz tussen 2008 en 2013 ondersteuners wêreldwyd aangegryp. Hulle is selfs genooi om in 2011 op prins Albert van Monaco en Charlene Wittstock se koninklike troue te sing.
Die talentvolle manne het nie net saam sukses gesmaak nie; hulle staan mekaar deur dik en dun by. “Ons het van die begin af ’n gentlemen’s
agreement gehad,” vertel Louis: “Wanneer enige van die lede deur diep waters gaan, sal die res altyd daar wees om hom op te help.”
Adam en sy medelede het woord gehou toe ’n poliep in 2010 op Louis se stembande gediagnoseer word. Hy moes toe sy stem drie maande laat rus.
Nou is dit hul beurt om Adam by te staan, “selfs al is ons nie meer ’n groep nie”, sê Louis.
“Ons kameraadskap strek veel dieper as ons sangloopbaan. Ons is soos broers.”
Toe Burgerd destyds ’n persoonlike laagtepunt in sy lewe beleef, het Adam hom moed ingepraat. Burgerd onthou nog sy woorde: “Byt net vas, Boeta, die Here is altyd getrou.”
Louis het Adam in Desember op Knysna gesien waar hy en Almitra saam met klein Carmie vakansie gehou het. Adam het Carmie in dié seevakansie aan Louis kom voorstel.
“Selfs toe het hy so ’n positiewe energie uitgestraal dat hy hierdie struikelblok sal oorkom,” vertel Louis.
“Adam het nog altyd ’n diep band met die Here gehad,” sê André. “Hy moet net kophou. Wanneer jou lyf ingee, mag jou gees nie ook ingee nie.”
Die drie voormalige sangmaats het net lof vir Almitra. André beskryf haar as ’n “baie sterk en onafhanklike vrou” en voeg by: “Om boonop ’n babatjie te versorg terwyl jou man in die hospitaal met sy gesondheid sukkel, verg baie deursettingsvermoë en krag.”
Dan onthou die drie die sorgelose dae toe Adam hulle graag poetse gebak het, soos die keer op een van Romanz se landwye toere toe Louis in die stort was en Adam deur ’n oop venster ’n swart sokkie op hom gegooi het.
“Ek het so groot geskrik en gespartel dat ek letterlik die stort se deur uit sy kosyn geruk het,” lag Louis.
Watter boodskap het sy kamerade nou vir Adam? “Hy moet net aanhou baklei,” sê André. “Hy moet weet watter groot inspirasie hy vir ons is, en ook vir al sy aanhangers.”
“Hy moet sterk wees,” sê Burgerd, “en op die Here en sy beloftes vertrou.”
En Louis voeg by: “Ons hoop regtig hy word gou beter. Ons is daar vir hom en sal altyd ons gentlemen’s agreement nakom.”