DIÉ WEEK IN DIE GESKIEDENIS
18 APRIL 1924: EERSTE BLOKRAAIBOEK UITGEREIK
Die eerste blokraaiboek is op die rakke in Amerika beskikbaar. Hoewel blokraaie toe al ’n instelling was in onder meer koerante, het dié boek van Simon & Schuster ’n opskudding en nuwe gier tot gevolg gehad. Baie waarnemers het destyds beweer blokraaie is net ’n mors van tyd. Maar kyk nou net! Dis deesdae nog net so gewild en ook al jare lank sinoniem met Huisgenoot.
18 APRIL 1956: PRINS RAINIER EN GRACE KELLY TROU
Alle oë is op Monaco vir die “troue van die eeu”: die bruilof van prins Rainier en Die Oscar-bekroonde Hollywood-aktrise Grace Kelly. Die paartjie het op dié dag in die Prins Se Paleis in ’n burgerlike seremonie afgehaak. ’n Dag later het 30 miljoen mense voor hul kassie ingeskuif vir die swier van hul Katolieke seremonie.
14 APRIL 1986: DESMOND TUTU AARTSBISKOP VAN KAAPSTAD
Desmond Tutu word die eerste swart Anglikaanse aartsbiskop van Kaapstad. Dié oudonderwyser en anti-apartheidsaktivis wat op Klerksdorp gebore is, het dié amp beklee tot hy in 1996 afgetree het. Hy was ook voorsitter van die Waarheids-en- ids-enversoeningskommissie. Dié emeritus-aartsbiskop en wenner van die Nobelvredesprys, wat nou al 85 jaar oud is, het hom sterk beywer vir menseregte en het die term “reënboognasie” geskep.
19 APRIL 1987: BART SIMPSON MAAK SY BUIGING
Die animasiegesin The Simpsons maak hul debuut op die kassie as ’n kort insetsel op die Amerikaanse TV-program The Tracey Ullman Show. Ná drie seisoene het Bart Simpson, sy ouers, Marge en Homer, en susters, Lisa en Maggie, twee jaar later hul eie halfuur lange TV-program gekry. In 2009 het hulle die wêreldrekord verbeter vir die sitkom wat al die langste op die kassie is. Dit het selfs ’n ster op die Hollywood Walk of Fame.
– LARA ATSON BRONNE: PEOPLE.COM, BBC.CO.UK, WIKIPEDIA.ORG, ONTHISDAY.COM, FAMOUSDAILY.COM, HELLOMAGAZINE. COM, DIE BURGER