JOU BELEGGINGS EN JOU ERFGENAME
Wie vind baat by jou beleggings die dag wanneer jy sterf, en hoe word hulle daarop belas?
AFTREEFONDSGELD
Ingevolge die Wet op Pensioenfondse besluit die trustees van ’n aftreefonds hoe jou voordele verdeel word. Die trustees kry 12 maande om jou afhanklikes op te spoor en te besluit aan wie dit uitbetaal word. Hulle besluit ook hoeveel elke afhanklike kry. Dit word gedoen al het jy begunstigdes benoem. Jou begunstigdes sal in ag geneem word, maar die trustees moet seker maak dis ’n regverdige verdeling. Die pensioenvoordeel is nie deel van die boedel nie en word dus so teen krediteurs beskerm.
ANNUÏTEITE
As jy ’n lewende annuïteit het, kan die oorblywende beleggingswaarde aan jou begunstigdes nagelaat word. Dit word nie deel van die boedel nie en is nie onderworpe aan boedelbelasting en eksekuteursfooie nie. Dit kan wel deel van die boedel word as jy nie begunstigdes benoem het nie of as jou begunstigdes nie opgespoor kan word nie. Gewaarborgde annuïteite eindig gewoonlik wanneer jy sterf en niks word dan oorgedra nie, sê Thandi Ngwane van Allan Gray.
EFFEKTETRUSTS
Die belegging word deel van jou boedel wanneer jy sterf. Dit beteken dit is onderworpe aan boedelbelasting en word nie beskerm teen mense of maatskappye aan wie jy geld skuld nie. Die eksekuteur van jou boedel sal al jou bates, soos die geld in die belegging, verdeel om jou skuldeisers en erfgename te betaal. Die beleggingsmaatskappy betaal gewoonlik die belegging uit volgens die eksekuteur se aanwysings nadat die maatskappy ’n sterftekennisgewing ontvang het.
LEWENSPOLISSE
Die opbrengs word regstreeks aan die begunstigdes uitbetaal. Omdat dit nie deel van die boedelbereddering is nie, word eksekuteursfooie nie gehef nie. Dis nie waar dat boedelbelasting nooit op lewenspolisse gehef word nie. As jy dit aan ’n oorlewende gade nalaat, word boedelbelasting nie betaal nie, maar ander begunstigdes kan wel belas word. Vra jou adviseur of jou begunstigdes boedelbelasting sal moet betaal. As jy nie begunstigdes benoem nie, is dit deel van jou boedel.
‘Jy leer eers iemand behoorlik ken die dag dat julle ’n erflating moet deel’ – DIE SWITSERSE DIGTER JOHANN KASPAR LAVATER ( 1741- 1801)