OU VERHAAL, NUWE KINKELS
Hoewel die nuwe Beauty and the Beast – met régte mense – die geld laat inrol, loop dit ook onder kritiek deur
DIS ’n eeue oue sprokie, maar steeds so betowerend dat die jongste weergawe daarvan groot en klein wêreldwyd na rolprentteaters laat stroom terwyl die geld blitsvinnig inrol. Beauty and the Beast het in sy eerste naweek R2,4 biljoen by die loket verdien. Dis reeds meer as die R2,2 biljoen wat dit gekos het om dié skouspel te vervaardig.
Fliekvlooie wat hulle kleintyd in die klassieke Disney-sprokie verlustig het, sal dit waarskynlik vir hul kleingoed wil gaan wys wanneer dit op 14 April in Suid-Afrika uitgereik word. Anders as die weergawe van 1991 is dit nie ’n tekenprent nie; akteurs van vlees en bloed speel daarin. Emma Watson van Harry Potter-faam en Dan Stevens van Downton Abbey vertolk die hoofrolle.
Die storie het ook ’n paar verrassende nuwe wendings, soos ’ n mens van ’n 21ste-eeuse Hollywood-treffer sou ver- wag.wa Die hoofkarakter Belle is geen hulpelosehu skepsel nie; sy is ’n vrou wat ’n plan kan maak. Sy vind selfs ’n wasmasjien uit. Disney maak ook met dié fliek geskiedenis deur vir die eerste keer ’n gay karakter in te sluit.
Andersins stem die intrige baie ooreen met die oorspronklike treffer oor ’n wrede monster – hy is eintlik ’n prins oor wie ’n bose fee ’n vloek uitgespreek het – wat die pragtige Belle gevange neem.
Emma (26), ’n kampvegter vir vroueregte en sleutelfiguur in HeForShe, ’n Verenigde Nasies-veldtog vir geslagsgelykheid, loop onder kritiek deur omdat sy die rol van ’n vrou in nood aanvaar het.
Sommige reken Belle se verhaal handel op sy beste oor ’n vrou wat in ’n verhouding mishandel word, maar tog dink sy kan die man red wat haar leed aandoen.
Party kritici beweer selfs Belle ly aan Stockholmsindroom, ’n sielkundige steuring wat soms onder slagoffers van ’n ontvoering voorkom. Dit behels dat hulle met hul gevangenemer begin simpatiseer of selfs tot hom aangetrokke voel.
Maar Emma meen die kritici het die kat aan die stert beet. Dié aktrise, wat ’n graad in Engels aan die gesogte Brownuniversiteit in Amerika verwerf het, het trouens daarop aangedring dat haar karakter ’n onafhanklike vrou moet wees.
Die kritiek sal Emma waarskynlik nie van stryk bring nie
Die aktrise erken sy het self aan die begin met die kwessie van Stockholmsindroom geworstel. “Dis waar ’n gevangene dieselfde eienskappe as die gevangenemer begin toon en op hom verlief raak. Maar Belle redeneer met Beast en verskil gedurig van hom. Sy het geen kenmerke van iemand met Stockholmsindroom nie, want sy behou haar onafhanklikheid en gebruik haar kop.”
Sy kan haar man staan, het Emma in ’n onlangse onderhoud van haar karakter gesê. “Daar is ’n uitdagendheid aan haar, amper asof sy sê: ‘Jy dink ek gaan saam met jou kom aandete eet en ek is jou gevangene – beslis nie.’ ”
Anders as die gebruiklike, hulpelose sprokiesheldin, verruil die nuwe Belle haar satynskoene vir stewels en werk sy self as uitvinder, pleks van net haar pa se assistent wees. Sy vind ’n wasmasjien uit sodat sy die tyd wat sy wasgoed sou gewas het, kan benut om te lees.
Terwyl almal die boekwurm Belle dié plesiertjie gun, het die verskyning van die eerste gay karakter in ’n Disney-fliek ’n herrie veroorsaak. Die besluit om die skurk Gaston se parmantige handlanger LeFou (gespeel deur Josh Gad) homoseksueel te maak, is uit verskillende oorde veroordeel – ook uit gay geledere.
Aan die een kant het dit konserwatiewe kykers so gebelg dat die rolprent by ’n teater in Alabama in Amerika verbied is. In Maleisië, waar homoseksuele bedrywighede onwettig is, het hul sensuurraad gedreig om dit te verbied tensy die enkele gewraakte toneel uitgesny word. Toe Disney weier, het die raad die fliek goedgekeur, maar met ’n ouderdomsperk van 13 en ouerleiding. In Rusland word dit met ’n ouderdomsperk van 16 vertoon.
Bill Condon, die regisseur van Beauty and the Beast, is gay. Hy beskryf die kort, omstrede toneel as “’n lekker, uitsluitlik gay oomblik in ’n Disney-fliek”.
Tog het dit blykbaar nie aan die LGBTgemeenskap se verwagtings voldoen nie. Dis “teleurstellend en ietwat beledigend” dat die gay karakter die skurk se handlanger is, skryf die Amerikaanse skrywer Damian Alexander op die webtuiste Polygon.
“Dit lyk of gay mense net ’n deel van Disney se wêreld kan uitmaak as hulle in knip-jou-oë-en-kyk-dit-mis-oomblikke verskyn met ’ n bordjie van skurk se handlanger om die nek,” was sy bitter kommentaar.
Beeldskone Belle
Emma het al voorheen die kans gekry om ’n prinses in ’n Disney-fliek te speel, maar sy het die hoofrol in Cinderella van die hand gewys, glo omdat sy nie by die karakter aanklank gevind het nie. Lily James het toe in die nuwe weergawe daarvan verskyn. Dis in 2015 uitgereik.
Nadat die hoofrol in die bekroonde musiekblyspel La La Land vir Emma aangebied is, het sy ook kop uitgetrek – en dit vir ’n rol wat Emma Stone vanjaar ’n Oscar vir beste aktrise besorg het.
Die kritiek wat sy haar op die hals gehaal het oor haar besluit om wel die rol van Belle te aanvaar, sal Emma waarskynlik nie van stryk bring nie.
Daarby kan sy heelpad bank toe lag. Bronne het aan The Hollywood Reporter gesê sy is vooraf meer as R39 miljoen vir die fliek betaal. Maar dit kan haar maklik nog R195 miljoen in die sak bring as Beauty and the Beast ewe goed by die loket vaar as Maleficent, Angelina Jolie se weergawe van Sleeping Beauty van 2014. Dit het ’n wêreldwye bruto inkomste van R9,9 biljoen opgelewer. Kenners meen Beauty and the Beast sal waarskynlik net soveel laat instroom.
Intussen hoef Emma nie naels te kou oor haar salaristjek nie. Sy het al erken sy het as Hermione in die agt Harry Potterflieks soveel geld gemaak, sy hoef nooit weer te werk nie.
Beast, die ondier
Vir die grootste deel van die rolprent sal kykers nie Dan se gesig herken nie. Maar dis einste hy, al is hy onder prosteses begrawe en met ’n rekenaar gedokter om nog meer monsteragtig te lyk.
Jy sal dalk dié 34-jarige gebore Londenaar as die sjarmante Matthew Crawley van Downton Abbey onthou. Hy het van 2010 tot 2012 in dié periodedrama gespeel. Die aantreklike blouoogman is getroud met ’n Suid-Afrikaner, Susie Hariet, ’n jazzsangeres en sangonderwyseres. Hulle het ’n dogter, Willow (7), en seun, Aubrey (4).
Dan, wat ’n Lycra-spierpak en 25 cm hoë staalstelte vir sy uitbeelding van Beast moes dra, sê die rolprent was “die grootste ding wat ek al gedoen het. Wel, dit en my kinders grootmaak.”
BRONNE: EW.COM, HOLLYWOODREPORTER.COM, DEADLINE. COM, THEGUARDIAN.COM, POLYGON.COM, VANITYFAIR.COM, ATTITUDE.CO.UK