Koningin se keurige presente
Van die besonderse geskenke wat die koninklikes oor die jare ontvang het, word binnekort in die paleis uitgestal
VAN ’n keurige troon uit kralewerk tot stoetperdsemen van hoogstaande gehalte – as Brittanje se langs regerende monarg het koningin Elizabeth II al heelwat vreemde en wonderlike geskenke ontvang in haar 65 jaar op die troon.
In haar heerskappy van meer as ses dekades het die matriarg, wat op 21 April 91 jaar oud word, na raming meer as 1 600 amptelike presente ontvang. Dit word gewoonlik tydens ’n koninklike besoek aan die buiteland of wanneer ’n staat s leie rin Buckingham-paleis ontvang word as welwillendheid s gebaar aan die koningsgesin gegee.
Die besoekende staatshoof se soms lomp oorhandiging van ’n unieke item aan Haar Majesteit is as’t ware ’n standaardkenmerk van amptelike paleisbesoeke.
Dit was veral die geval toe pres. Jacob Zuma Buckingham-paleis in 2010 vir die eerste keer besoek.
Ons veelbewoë leier het behoorlik gestraal van trots toe hy ’n spesiaal handgemaakte skaakstel oorhandig, kompleet met glas-en-piouter-stukke van Zoeloeen Xhosa-krygers.
The Telegraph se kultuurredakteur, wat destyds daar was, het geskryf: “‘Die volmaakte geskenk,’ het Zuma seker gedink. ‘Dekoratief, simbolies van my kultuur en erfenis en uiters ongewoon. Sy kon nog nooit so iets gesien het nie.’ ”
Die koningin het die geskenk natuurlik met grasie ontvang.
Maar skaars 20 minute later, terwyl die twee rondgeskuifel het op ’n toer deur die paleis se kunsgalery, het die president gaan staan om ’n geskenk te bewonder wat oudpres. Nelson Mandela in 1996 gegee het aan prins Philip, die koningin se 95-jarige man.
’n Skaakstel. Die stukke is in die vorm van Zoeloe-stamlede gekerf. Dit was amper identies. “’n Verleë stilte. “‘O, nog ’n stel,’ het mnr. Zuma gesê terwyl hy staan en rondtrap. Die arme man wat vroeër in die dag so uitgelate was, het baie afgehaal gelyk.”
NATUURLIK is van die sierade wat die koninklikes present kry uiters kosbaar. Maar selfs al beland die koningsgesin geldelik in die knyp, wat hoogs onwaarskynlik is, sal hulle dit nie kan opveil nie.
Streng reëls geld vir die verkoop en uitruil van amptelike geskenke. Dit word alles deel van die koninklike versameling, ’n trust van die koningin vir haar opvolgers en land.
Die weelderige items word almal in die koninklikes se onderskeie woonplekke uitgestal, soos Windsor- en Balmoral-kasteel, Holyrood-paleis en Sandringham House.
Maar omdat dit die jaar van die Britse koninklikes se heel eerste saffierjubileum is (om 65 jaar te gedenk), word 250 van hierdie waardevolle items as deel van die someropening van die staatsvertrekke van 22 Julie tot 1 Oktober in Buckingham-paleis uitgestal.
Die koninklikeversamelingtrust se webtuiste dui aan: “Die uitstalling sal Haar Majesteit se rol as staatshoof, hoof van die Statebond en hoof van die volk verken. Dit sluit in geskenke wat tydens staatsbesoeke, toere in die buiteland en amptelike geleenthede ontvang is en dié wat geskenk is om merkwaardige oomblikke in die koningin se lewe te gedenk.”
Die skaakstel wat Madiba aan die koningsgesin gegee het, is een van die belangrikste items op die uitstalling. Dit is nog nie duidelik of Zuma s’n ook uitgestal sal word nie. BRONNE: THE GUARDIAN, DAILY MAIL, THE TELEGRAPH, ROYALCOLLECTION.ORG