Sukkel jy om by te hou met maandelikse betalings? So kan jy jou premie verlaag
BEPERK RISIKO’S
Baie versekeraars gee afslag vir goeie veiligheidsmaatreëls. As ’n mens die risiko vir diefstal by jou huis beperk, daal jou premie. Neem byvoorbeeld iemand van 40 jaar wat in Gauteng woon, met huisinhoudsversekering van R450 000. Hul premie kan wissel van R260 tot R500 per maand. As die huis toegerus is met ’n alarmstelsel wat verbind is aan ’n veiligheidsmaatskappy, kan hulle tot 15 persent afslag kry op die premie. En as hulle in ’n veiligheidskompleks woon, kan ’n ekstra afslag van tot 10 persent toegestaan word, sê Lizette Erasmus van IntegriSure.
DIEFSTAL UITGESLUIT
As jou veiligheidsmaatreëls baie goed is, kan jy dit oorweeg om diefstal- en inbraakdekking uit te sluit tot jy weer finansieel sterker is. Dit kan jou premie baie verlaag. Jy het steeds dekking teen stormskade, hael, weerlig en brande, sê Lizette. Maar jou veiligheid moet uitstekend wees, want die versekeraar sal geen diefstal of inbraak dek nie. Jy kan diefstaldekking op items soos versamelaarstukke of antieke ware ook tydelik uitsluit.
HUISEIENAARSVERSEKERING
Dis dekking vir die geboue en strukture op jou erf. ’n Leser se premie vir huiseienaarsversekering het met omtrent 50 persent gekrimp en hy het meer omvattende dekking gekry deur van diensverskaffer te verander. Baie mense met huisverbande gebruik outomaties die bank se korttermynversekeraar, maar jy mag ander kwotasies vra. Jy kan ook later van versekeraar verander. Die bank moet net tevrede wees dat jou dekking voldoende is. As al jou versekering by een maatskappy is, bied die meeste verskaffers ook afslag.
BETAALPROBLEME
Ingevolge die polishouerbeskermingsreëls van die Wet op Verbruikersbeskerming gee die meeste versekeringverskaffers ’n maand grasie as jy nie jou premie betaal het nie. Daarna word ’n dubbele premie verhaal. Betaal jy nog nie, word die polis gekanselleer. Jy kan weer ’n polis uitneem, maar die hele aansoekproses word herhaal. As jy wil eis in die maand wat jy nie betaal het nie, sal jy dalk eers die uitstaande premie moet betaal.
‘Jy is eers waarlik ryk as jy iets besit wat geld nie kan koop nie’ – DIE AMERIKAANSE SANGER GARTH BROOKS