Lag ’n Slag
Stuur gerus oorspronklike grappies; jy kry R50 vir elkeen wat ons gebruik. Skryf aan Lag ’n Slag, Posbus 1802, Kaapstad 8000 of grappies @huisgenoot.com en verstrek jou naam, adres, identiteitsnommer en bankbesonderhede (bank, taknaam, takkode en rekening
MISVERSTAND
Die blondine bel haar kêrel: “Kom gou. Ek het ’n legkaart gekoop en daar is duisende stukke. Ek weet nie waar om te begin nie.”
Kêrel: “Wat moet dit wees wanneer dit klaar gebou is?”
Blondine: “’n Hoenderhaan.” Die kêrel jaag daarheen, stap by die huis in en bekyk die stukke wat oral lê.
Hy tel die boks op en sê: “Ai, my engel, hiermee gaan jy nooit ’n hoenderhaan gebou kry nie. Gaan maak jy vir ons tee, dan gooi ek gou die graanvlokkies terug in die boks.” WOLLIE, PRETORIA
UITGEVANG
Op ’n Maandagoggend roep ’n werkgewer een van sy werknemers na sy kantoor. “Glo jy aan ’n lewe ná die dood?” vra hy hom.
Die werknemer is verbaas oor die vraag, maar antwoord: “Ja, Meneer.”
“Ek is bly om dit te hoor,” sê die werkgewer, “want Vrydagmiddag nadat jy verlof gevra het om na jou ouma se begrafnis te gaan, het sy hier aangekom om jou te sien.” PVDB, STRAND
VINNIG GELDMAAK
’n Man stap by ’n prokureur se kantoor in en vra wat die koste van ’n konsultasie is.
Hul standaardtarief is R1 000 om drie vrae te beantwoord, verduidelik die prokureur. “Maar is dit nie te duur nie?” vra die man. “Ja,” antwoord die prokureur. “En wat is jou derde vraag?” PVDB, STRAND
KOUDGESIT
Een oggend vroeg sluip ’n man suutjies uit die bed, loop op sy tone deur die huis na die agterdeur, sluit dit oop, pak al sy visvanggoed in sy bakkie en klim in. Hy ry in trurat tot by sy boot en haak dit aan, maar die wind waai verskriklik en dis baie koud.
Hy klim terug in die bakkie, skakel die radio aan en luister na die weervoorspelling. Hy hoor sterk stormwinde en reën word vir die hele naweek voorspel.
Toe haak hy maar die boot af, pak alles weg, gaan weer suutjies by die huis in en klim terug in die bed. Hy fluister vir sy vrou: “Sjoe, maar dis sommer koud buite.”
“Ja,” antwoord sy slaperig. “En kan jy glo my man het vir die hele naweek gaan visvang?” G. CLAASSEN, POTCHEFSTROOM
GELUKKIGE MAN
’n Seuntjie oordink alles wat hy by die Sondagskool hoor vreeslik en vra sy pa: “Wat was Adam se skoonma se naam?”
Sy pa antwoord: “Hy het nie ’n skoonma gehad nie; jy moet onthou hy het in die paradys geleef.” RIFAT VAN WYK
DUIDELIKE TEKEN
Hoe weet jy watter rouklaer is ’n blondine?
Die een wat sing: “Lank sal hy lewe . . .” D. SMIT, MOKOPANE
ANDERSTE AFSPRAAK
’n Padda besoek ’n waarsêer en sy voorspel: “Jy gaan binnekort ’n mooi en slim jong meisie leer ken, en sy sal als oor jou te wete wil kom.”
“Fantasties!” sê die padda. “En waar sal ek haar ontmoet, by ’n fees of so?”
“Nee,” antwoord die waarsêer. “In die biologieklas.” DENISE, PRETORIA
DUUR KUUR
“Help hierdie middel regtig vir hare wat uitval?” vra die kliënt sy haarkapper.
“Ja, beslis. Een van my kliënte, wie se kop so kaal soos ’n eier is, het gesê toe hy die rekening kry, kon hy sy hare uit sy kop trek.’’ L. SAAYMAN, SABIE
G'N DEUGNIET
“Jy kry nooit iets reg nie,” kla die onderwyser. “Watter werk sal jy eendag kan doen?” “Wel,” antwoord die leerder, “ek kan ’n weervoorspeller word.” SAN MARCHAND
GROOT VERBETERING
Koos het ’n oog op oom Jan se mooi dogter, maar ongelukkig is die oom net so kwaai soos wat sy dogter mooi is. Ná ’n paar probeerslae om daar te gaan kuier vertel Koos vir sy beste vriend, Piet: “Ek dink oom Jan begin nou van my hou.’’
“Hoe so?’’ vra Piet. “Het hy jou nie weer by die agterdeur uitgegooi nie?’’
“Ja, hy het,’’ antwoord Koos, “maar vanaand het hy eers die deur oopgemaak.’’ BASIE, RANDFONTEIN
KLAAR TE LAAT
Teen die tyd dat ’n vrou besef haar ma was toe heeltyd reg, het sy ’n dogter wat dink sý is verkeerd. HESTER, NAMIBIË
UIT DIE BOEKE
Koos: “Ek het ’n sprokieshuwelik.” Piet: “Nou hoe so?’’ Koos: “Elke aand wanneer ek by die huis kom, sit ’n heks op die bank in die sitkamer.’’ F.H. HORNE, HARTENBOS
SOEK DIE VERSKIL
Wat is die verskil tussen ’n eiendomsontwikkelaar en ’n omgewingsaktivis?
’n Eiendomsontwikkelaar is iemand wat in die bos ’n huis wil bou.
’n Omgewingsaktivis is iemand wat reeds ’n huis in die bos het. L. SAAYMAN, SABIE