VIERVOETIGES VERDIEN GOEIE SORG
DIT is weer skoolvakansie en langnaweke, wat beteken baie weggooidiere gaan soos gewoonlik by die Dierebeskermingsvereniging (DBV) beland. Wanneer hulle nie meer hokke vir al die weggooidiere het nie, moet die DBV van hulle van kant maak, maar dan word hulle daarvan beskuldig dat hulle wreed is. Mense wat die DBV so kritiseer, het geen benul hoe ’n moeilike en hartseer werk daardie mense het nie. Dis hulle wat in die verstote troeteldier se ogies moet kyk wanneer hulle die noodlottige inspuiting toedien. Hoekom? Omdat sy eienaar die moeite of koste ontsien het om ’n oppasser te kry terwyl hulle alte lekker by die see gaan vakansie hou.
Dan word die DBV boonop vir hul aannemingsbeleid gekritiseer. Natuurlik moet die dier wat jy aanneem eers gesteriliseer word. Daar is reeds te veel oulike babakatjies en -hondjies wat nie ’n huis het nie en waarskynlik net weer by die DBV gaan beland om eindelik van kant gemaak te word.
As jy iets wil doen, laat steriliseer jou eie diere en oorreed almal met wie jy in aanraking kom om ook so te maak. Verduidelik aan hulle hul basiese verpligting teenoor hul troeteldiere: kos, water, skuiling, liefde – en sterilisasie. Opvoeding is broodnodig. En meld altyd enige vorm van wreedheid teenoor diere aan. Onthou, as jy stilbly, is jy eintlik net so skuldig.
Moenie telers ondersteun nie. Hulle het nie ’n saak waarheen hul teefhond se kleintjies gaan nie; hulle soek net jou geld. As jy ’n troeteldier soek, gaan kry een by die DBV of enige ander reddingsorganisasie.
Maak hierdie vakansietyd minder traumaties vir ons diere en ook vir al die mense wat by die DBV werk. CHRISTIA, MACHADODORP