DIS LEGO OP STEROÏEDE!
DIE skerm van sy skootrekenaar staan skuins, maar dit keer Jaco Kruger nie om ewe kunstig met Lego-blokkies ’n konstruksie daarop te begin bou nie. Hoe op aarde kry hy dit reg? Dis danksy buigbare plastiekkleeflint vol knoppies dat hy Legoblokkies op enige oppervlak – selfs vertikaal teen ’n muur, spieël of aan weerskante van ’n ruit – kan staanmaak.
Maar waarom is ’n 52-jarige sakeman so gefassineer met dié boublokkies vir kinders? Daardie plastiekkleeflint waarmee jy jou Lego-boudrome nog wilder draaie kan laat maak, is die jongste uitvindsel van Chrome Cherry Design Studio in Kaapstad. Jaco is die besturende direkteur van dié ontwerponderneming.
Nog voor dit op die winkelrakke ver- Deur skyn, is die speelgoedwêreld al kinderlik opgewonde daaroor. Toys R Us in Noord-Amerika wil eerste kans kry om Nimuno Loops ® , soos die spesiale kleeflint genoem word, 60 dae lank in hul 570 winkels daar te verkoop.
Dit maak ook geskiedenis as die skarebefondsing uit eie bodem wat die aanvanklike mikpunt op die Indiegogoplatvorm die verste oorskry het. Tans is dit in die 16de plek wat geldinsameling betref. Dit kan tot 12de klim, en dit vir ’n goedkoop produk. Jaco en sy span uitvinders het gehoop om sowat R112 000 in te samel om die produk te ontwikkel en in grootmaat te vervaardig. Maar binne 48 uur het ongeveer R14 miljoen ingestroom uit die sakke van 40 000 begeesterdes wêreldwyd. Hulle sal die produk eerste ontvang. Teen druktyd het Jacohulle al sowat R23,8 miljoen ingevorder.
“Moontlik die beste uitvindsel van 2017,” noem die Amerikaanse tydskrif USA Today hierdie “Lego-wonder”. Gerekende tegnologietydskrifte en ook die nuustydskrif Time het daaroor berig. Video’s op YouTube verduidelik ook al hoe dit gaan werk wanneer dit beskikbaar is.
En dit alles gebeur onder Jaco se vaandel. In ’n ou T-hemp en tekkies lyk hy meer soos ’n blommekind met ’n klap weg van die Virgin-baas, sir Richard Branson, as na die grootbaas van die gewilde Ybikes. Hierdie duursame plastiekfietse bekoor jong kinders al die afgelope dekade wêreldwyd en verbeter hul growwe motoriese vaardighede sodat hulle op twee wiele kan leer balanseer.
“Ek wil sorg dat kinders voordeel trek uit ons uitvindsels. Met Nimuno leer hulle fyn motoriese vaardighede deur die strokies in enige vorm te knip en dan die blokkies daarop te bou,” sê Jaco, die pa van Anja (18) en Emma (15).
Hy gesels met ons in ’ n vriend se “wegkruiphuisie” by L’Agulhas aan die mees suidelike punt van Afrika. Hy het van “die lekker chaos van die laaste tyd” kom ontvlug.
Alles het begin toe Anine Kirsten (29), een van sy onderneming se staatmakers in nywerheidsontwerp, verlede jaar op ’n speelgoedskou in New York was. Danksy ’n vriend het sy daar begin belangstel in die ontwerp van aanvullende produkte vir Lego-blokkies. Die patent op dié Deense speelgoed het in 2011 verval.
Terug in die Kaap het sy en die span by Chrome Cherry idees begin bespreek en met die konsep van kleeflint vir Legoblokkies vorendag gekom. Dit het ses maande geneem om te ontwikkel.
As skoolseun van Somerset-Wes het hy al “mal planne” gehad en daarvan gedroom om ’n uitvinder te word, vertel Jaco. Maar hy het eers ’n bosbougraad en ’n M.B.A. aan die Universiteit Stellenbosch verwerf, en daarna ’n restauranteienaar en sakeontwikkelaar geword voor hy 10 jaar gelede saam met drie vriende uit sy studentedae sy eie ontwerponderneming gestig het.
Aan die einde van elke werkweek, op “Madhatters Fridays”, sit almal by ’ n kuierplek koppe bymekaar om nuwe idees uit hul verbeelding op te tower. “gebeur wanneer ons dié idees bespreek,” verklap Jaco. “My kop is mal met nog idees,” voeg hy by. “Ons moet hulle net so gou moontlik op die mark kry.” EKSTRA BRONNE: SOMERSETLIVE.CO.UK, CHROMECHERRY.COM, NETWERK24.COM