OP DIE RAND VAN ’N 3DE WÊRELDOORLOG?
As deel van ons 101-jarige bestaan help ons lesers sin maak van aktuele gebeure. Dié week: Kan die onmin tussen Trump en Poetin tot ’n katastrofe lei?
NOOIT weer nie, was die konsensus ná die afgryslike menseslagting van twee wêreldoorloë. Toe kom die Koue Oorlog (onder meer die kernwapenwedloop tussen Amerika en die Sowjetunie), maar die blote gedagte aan ’n kernoorlog tussen die kommunistiese Ooste en die kapitalistiese Weste was genoeg om ’n Derde Wêreldoorlog te verhoed. Dit sou die einde van die mensdom beteken, het kenners gewaarsku.
Mettertyd het die praatjies oor ’n derde wêreldkonflik amper na wetenskapsfiksie begin klink, iets wat in rampflieks hoort. Maar nou, 72 jaar ná die val van Nazi-Duitsland en 27 jaar ná die Koue Oorlog, word weer kliphard gepraat oor ’n Derde Wêreldoorlog, een wat sommer gou kan losbars.
Kyk ’n mens gereeld TV-nuus, staan jou nekhare orent. Die plofbare pres. Donald Trump van Amerika en die onvoorspelbare pres. Wladimir Poetin van Rusland was taamlik onlangs oënskynlik nog maats, maar het intussen stry gekry – en dit oor die Siriese diktator, Basjar alAssad, wat sy landgenote met chemiese wapens uitmoor. Terwyl Russiese vliegtuie lustig meedoen aan Al-Assad se lugaanvalle op Siriese rebelle en burgerlikes, het Trump onlangs ’n missielaanval op ’n Siriese lugmagbasis gelas.
Poetin se antwoord was om die Russiese vlag oor Siriese basisse te hys. Die boodskap aan Trump? Val jy Al-Assad aan, val jy Poetin ook aan.
Intussen speel Trump en die koddige Noord-Koreaanse diktator, Kim Jongoen, ’n dodelike blufspeletjie. Trump waarsku hy gaan nie dreigemente van Kim duld nie. Kim reageer deur missiele en kernbomme te toets. Dan is Trump ook gewikkel in ’n ekonomiese bekgeveg met die nuwe supermoondheid, China.
En net om te wys hy is die sterkste ou op die speelterrein, gebruik Trump toe die moeder van alle bomme, die wêreld se kragtigste konvensionele wapen, om ’n paar dosyn vegters van die Islamitiese Staat (IS) in Afganistan uit te wis.
Het die wêreld mal geword? Is ons regtig op die randjie van ’n Armageddon?
“Ek glo nie die wêreld was al in ’n gevaarliker situasie as nou nie,” meen