NUWE DVD’S
MISS PEREGRINE’S HOME FOR PECULIAR CHILDREN
2016. 132 min. O1012GrG. Fantasie-avontuur. Ná die wrede moord op die 16-jarige Jake Portman (
se oupa gaan hy saam met sy pa, Frank (Chris O’Dowd), na Wallis op soek na antwoorde. Daar kom Jake af op ’n geheimsinnige portaal wat hom van 2016 na 1943 voer, waar hy kennis maak met Miss Peregrine ( die onwrikbare hoof van ’n skool vir begaafde jong mense met wonderlike vermoëns.
Aangesien die makabere nie vir hom vreemd is nie, was dit ’n inspirerende keuse om die regisseur Tim Burton (Sleepy Hollow, Alice in Wonderland) aan die stuur van die verwerking van Ransom Riggs se blitsverkoperroman te hê. Dié rolprent is dikwels somber met volop geweld en gruwels, maar ongelukkig maak die storie nie veel sin nie. Die intrige, wat deels ’n raaisel is, word gou verstrengel in ’n rits verwarrende tydreiskaskenades wat kykers gek kan maak. Die kinders en hul vermoëns herinner sterk aan die X-Men-reeks, met ’n soortgelyke tema, maar sonder daardie flieks se avontuurlustigheid. Selfs die veronderstelde klimaks maak jou nie opgewonde nie.
Gelukkig skitter Green in elke toneel waarin sy is, en haar karakter se aweregse humorsin help die rolprent voortstu. Haar wonderlike toneelspel en Burton se gotiese grille is al rede om dié eienaardige fliek te kyk. – PETRUS MALHERBE * DVD’s is teen dié pryse beskikbaar by takealot.com.
2016. 96 min. 16TS. Komedie. Die partytjiedier-broers Mike (Adam DeVine) en Dave (Zac Efron) bederf gereeld familietroues. Toe hul suster afhaak, stel sy ’n voorwaarde: Hulle mag net kom as hulle respektabele metgeselle bring om hulle dop te hou. So adverteer die broers vir metgeselle en kies die vriendinne Alice (Anna Kendrick) en Tatiana (Aubrey Plaza). Maar die skynbaar oulike meisies is nog wilder as Mike en Dave. Daar is heelwat vir die oog en ’n paar skreeusnaakse tonele in dié oordadige komedie, maar die grilhumor kan ’n mens afsit. – WILLEM MÖLLER
BLAIR WITCH
Moenie die lokfilm kyk nie; dit verklap die beste oomblikke. James Donahue (James Allen McCune) glo hy weet wat met sy vermiste suster, Heather (uit die vorige fliek), gebeur het. Hy en sy vriende vaar ’n woud in waaroor die gevreesde Blair Witch heers. Dié opvolg van die kultusprent The Blair Witch Project (1999) is tegnies baie beter, maar nie noodwendig meer geslaag nie. Destyds was ’n fliek wat saamgestel is uit kwansuis ontdekte beeldmateriaal iets nuuts. Maar sedertdien het flieks met bewerige kameraskote ’n mens behoorlik seesiek gemaak. Die heks sorg eers na aan die einde vir skrikoomblikke. – PIETER VAN ZYL
DESIERTO
Onwettige immigrante probeer die grens tussen Mexiko en Amerika ongesiens oorsteek. Ongelukkig gewaar ’n sadistiese Amerikaanse jagter (Jeffrey Dean Morgan) hulle en besluit om te keer dat hulle hul doelwit bereik – ’n lewe in die land van vryheid. Dié strak rolprent is gewelddadige en skokkende kykstof wat jou leeg en rou laat voel. Die kyker is verward oor die jagter se beweegredes, en die groep se leier by verstek (Gael García Bernal) oortuig nie. Die fliek se redding is die onvoorspelbare slot. Kyk dit net as daar niks anders is nie. – LYNN ELY Pryse was korrek met druktyd en is onderworpe aan verandering sonder vooraf kennisgewing.