LEEG, MY KUBERKLUIS!
As deel van ons 101-jarige bestaan help ons lesers sin maak van aktuele gebeure. DiéD week: Internetbankrowers raak ál meer bedrywig. Hoe beskerm jy jouself?
HY IS die toonbeeld van die moderne man: Wicus Pretorius, die stylvolle, welsprekende redakteur van die gewilde dekortydskrif Tuis. Maar onlangs het Wicus besluit hy is voorlopig klaar met die moderne wêreld, en spesifiek internetbankdienste, toe kuberrowers hom van meer as R100 000 beroof.
Die 44-jarige Wicus was totaal oorbluf en woedend toe hy besef die rowers het met ’n ongemagtigde simruiling sy bankrekenings binnegedring en sy tjek- en kredietkaart en oortrokke geriewe leeggestroop.
Hy het R43 in sy beursie oorgehad en moes geld uit sy verbandrekening trek terwyl hy antwoorde oor die bedrogspul uit Absa en Vodacom probeer kry het.
“Ek het my internetbankdienste laat kanselleer, die Absa-app uitgewis en geld uit my huisverbandrekening in my tjekrekening oorgeplaas sodat ek op die outydse manier met my bankkaart kon trek,” sê die ontnugterde redakteur in sy kantoor in die Kaapse middestad.
In April het hy vinnig opgetree toe iemand sy simkaart probeer omruil. Sy foon het op ’n aand nie meer gewerk nie en hy het Vodacom dadelik gekontak en sy bankrekeninge gestop.
Die skelms kon toe nie sy rekenings plunder nie.
Maar op Werkersdag was Wicus minder gelukkig.
Hy het besef iets skort toe Absa ’n boodskap stuur om te vra of hy ’n nuwe begunstigde wil goedkeur van ’ n maatskappy genaamd Douglas and Divine.
Hy het dit geweier, maar toe sy foon skielik ophou werk en hy nie meer kon bel of enigiets anders doen nie, het die gevaarligte geflikker. Hy is dadelik na die naaste Vodacom-tak.
Ná die vorige mislukte aanslag op sy geld het Wicus Vodacom gevra om geen simruilings toe te laat tensy hy dit persoonlik in ’n winkel laat doen nie. In die tak kon hy dié opdrag op die agent se skerm sien flits, maar sy foon was steeds buite werking. En toe hy Absa bel, is sy ergste vermoedens bevestig: Hy is beroof met ’n sogenaamde “Trojaanse perd”skelmstreek.
Wicus het tevore al sy verbandrekening van die internetdiens afgehaal nadat ’ n kollega, Esmaré Weideman, deesdae hoof van Media24, in 2013 met ’n simruiling van R360 000 beroof is toe rowers geld uit haar verband- na haar tjekrekening oorplaas en dit daaruit steel.
Nou was sy verbandrekening darem veilig.
En omdat hy so vinnig opgetree het, kon Absa die onwettige betalings keer en die volle bedrag terugkry.
Wicus is steeds verstom dat sy rekeningbesonderhede uitgelek het.
“Hoe het die diewe dit gekry? Ek is ’n uiters privaat persoon; selfs my lewensmaat weet nie hoeveel ek verdien nie en ek sou nooit my wagwoord aan enigiemand gee nie.
“Ek is ook baie gesteld daarop om ou dokumente op te skeur.”
GRU-STORIES oor gestroopte bankrekenings en ’n ondersoek deur die Valke na ’ n moontlike sindikaat in Absa (Die stryd om ons verlore geld, 17 November 2016) beteken nie hul kliënte moet bekommerd wees nie, sê Marius de la Rey, hoof van kliëntekanale en verspreiding by Absa.
“Net 0,0001 persent van ons aanlyn kliëntebasis van 5 miljoen gebruikers (met ander woorde vyf ) is tot dusver vanjaar deur internetbankbedrog geraak; dit is ’n baie klein persentasie.”
Absa beskou kuberbedrog as baie ernstig, en die bank vernuwe gereeld sy sekerheidsmaatreëls en werk saam met die polisie en ander banke om hierdie soort misdaad te voorkom, verseker hy.
“Ons is nie bewus van enige skending in ons veiligheidstelsels nie,” het ’ n woordvoerder van Vodacom aan Huisgenoot gesê.
“Die grootste gedeelte van simruilings wat by Vodacom gedoen word, is regmatig, met slegs 0,004 persent wat moontlik met bedrieglike bankbedrywighede verband hou.” Hy het bygevoeg dat Vodacom deurentyd hul veiligheidsmaatreëls opdateer en verskerp.
Bankbedrog is nou die eerste keer boaan die lys klagtes wat deur die Suid-Afrikaanse waghond vir bankdienste ontvang word, sê Edrich Buytendorp, waarnemende ombudsman.
Dit beloop ’n kwart van alle klagtes, en tot dusver vanjaar is 74 gevalle van simkaartbedrog aangemeld vergeleke met 124 in die hele 2016.
Edrich kon nie verklap watter banke