VOER JOU KLAG VERDER

Verbruikers moet eers die saak met die onderneming self probeer oplos, sê adv. Neville Melville, die ombudsman vir verbruikersgoedere en -dienste. “Die instelling het 15 werkdae om die klagte te probeer oplos voor jy ons kan nader.”

Hy beveel aan dat verbruikers hul klagtes op die ombudsman se webtuiste aanmeld, want dan word dit outomaties na die regte afdeling gestuur. “Steun jou klag met papierwerk soos ’n betaalstrokie of advertensie.”

Onthou, kragtens die Wet op Verbruikersbeskerming het jy nie ’n absolute reg om ’n produk terug te gee waarmee jy ontevrede is nie, sê Neville. Van die voorwaardes kan wees dat jy nog die oorspronklike verpakkingsmateriaal en betaalstrokie moet hê.

Trevor Hattingh, woordvoerder van die Nasionale Verbruikerskommissie, sê nadat jy ’n klag by hulle aangemeld het, open hulle ’n saak en jy ontvang ’n verwysingnommer.

Die klagte word dan ontleed, en as dit meriete het, word dit vir ’n beslissing na ’n onafhanklike agent vir geskiloplossing of na ’n verbruikershof, tribunaal of ander reguleerder verwys.

Besoek die webtuiste van die ombudsman vir verbruikersgoedere en -dienste by cgso.org.za, bel 0860-000-272 of stuur ’n e-pos na info@cgso.org.za. Om ’n klag by die Nasionale Verbruikerskommissie in te dien, gaan na hul webtuiste, thencc.gov.za, bel 012-428-7000 of stuur ’n e-pos na complaints@thencc.org.za.