NUWE DVD’S
THE ACCOUNTANT
★★★★ 2016. 123 min. Die bobaaswiskundige Christian Wolff ( gebruik ’n kleindorpse rekenmeestersfirma as dekmantel om vryskutwerk vir misdadige meesterbreine van oral ter wêreld te doen. Nadat hy ’n werk losgeslaan het om die boeke van ’n groot robotika-onderneming reg te ruk, krap Christian met die hulp van sy kollega Dana (Anna Kendrick) meer oop as net waarheen die onderneming se vermiste miljoene is.
Met staatsamptenare op sy spoor, ’n niksvermoedende besoeker uit sy verlede en ’n stryd teen Aspergersindroom probeer Christian kop bo water hou.
Dit is geen tipiese oordadige aksierolprent nie; dit is interessant om te sien hoe Christian se toestand die manier beïnvloed waarop hy sake hanteer. Soms voel die pas traag en wonder jy of die storie verder gaan vorder.
Die klomp byspelers lyk eers oorbodig, maar later word hul doel in die storie duidelik en alles word netjies saamgeknoop om hoogs vermaaklike kykstof te bied. Wees op die uitkyk vir bekendes soos John Lithgow, JK Simmons en Jon Bernthal. – MAXINE PETERS * DVD’S is teen dié pryse verkrygbaar by takealot.com.
INDIGNATION
★★★★ 2016. 106 min. 13. Drama. Marcus Messner (Logan Lerman), die briljante seun van ’n Joodse slagter, gaan by ’n konserwatiewe Christelike kollege ver van sy huis studeer. Daar raak hy spoedig verlief op sy beeldskone klasmaat Olivia (Sarah Gadon) en kry hy dikwels stry met die kollege se hardkoppige dekaan, Hawes Caudwell (Tracy Letts). Dié rolprent, gegrond op Philip Roth se gelyknamige roman van 2008, is ’n tydlose verhaal van liefde en verlore onskuld en speel teen die agtergrond van die Koreaanse oorlog van die 1950’s af. Lerman se oortuigende spel dra dié boeiende drama oor die grootwordjare wat temas soos godsdiens, seks, oorlog en maatskaplike plig aanroer. ’n Moet. – PETRUS MALHERBE
MASTERMINDS
Dié verhaal wat op ware gebeure gegrond is, gaan oor twee domkop-kansvatters, Steve (Owen Wilson) en Kelly (Kristen Wiig). Toe hulle van ’n sekerheidswag hoor wat ’n transito-onderneming van miljoene beroof het, besluit hulle om dit ook te doen. Hulle betrek David (Zach Galifianakis), die bestuurder van ’n pantservoertuig, by hul plan. Toe die rooftog skeefloop, bel Steve, wat hom as die meesterbrein beskou, sy geheimsinnige vriend McKinney (Jason Sudeikis), maar dit krap sake net verder deurmekaar. Dit het al die bestanddele vir ’n geloofwaardige misdaad-eskapade en die akteurs doen hul bes, maar ’n slordige draaiboek en regie laat die rolprent in die steek. Dit sal jou darem ’n keer of wat laat lag. – WILLEM MÖLLER Pryse was korrek met druktyd en is onderworpe aan verandering sonder vooraf kennisgewing.