Ons manne verouder soos goeie wyn
Al stap die jare aan, maak Nico en ander bekende mans steeds die knieë lam. Hulle deel hul skoonheid s gehei meen wyshede
SY VROU noem hom nie verniet “McSteamy” nie. Die gewilde TVaanbieder en akteur Nico Panagio laat immers op 43 steeds harte bolmakiesie slaan. Hy het trouens soos rooiwyn deur die jare ál beter geword. Hy is nie net ouer, aantrekliker en wyser nie, maar ook gewilder as ooit.
Oral keer aanhangers hom voor vir ’n geselsie of om ’n vinnige selfie saam met hom te neem. En ná byna twee dekades op die kassie en die silwerdoek is hy nog net so gesog in die vermaakbedryf. In Desember is hy in die aksiekomedie Vuil Wasgoed te sien. Glad nie sleg vir iemand wat in sy hoërskooldae draadjies aan sy tande en puisies gehad het nie.
Deesdae is sy vel vlekloos en porseleinglad, en die draadjies het plek gemaak vir ’n spierwit supersterglimlag. Met sy swarten-grys hare en ’n stoppelbaard lyk Nico soos ’n wafferse George Clooney.
Oud word pla hom min, vertel dié pa van twee. “Ek is mal oor grys word. Ek geniet dit. Dit gee tekstuur aan my hare.”
Vandag is hy in ons ateljee in Kaapstad vir ’n fotosessie. “Jy lyk soos ’n jong Richard Gere,” laat hoor ’n nuuskierige wat kom in- loer het. “Dit is baie vriendelik van jou. Dankie,” antwoord Nico beskeie.
Dit is juis ouer Hollywoodakteurs soos Robert Redford (80) wat hom inspireer om die veroudering s proses te omhels. “’n Mens kan sien hy raak grasieus oud, sonder botoks,” sê Nico van die silwerdoek veteraan .“Dis so inspirerend.”
En “McSteamy” (oorspronklik die bynaam van ’n aantreklike karakter in die TV- reeks Grey’s Anatomy), die troetelnaam wat sy vrou, die aktrise Christi ( 39), hom gegee het? Nico lag uitbundig hier waar hy sit in ’n swart T-hemp en noupypjeans wat aan sy gespierde lyf kleef. “Solank my vrou so dink, is ek gelukkig,” laat hy hoor terwyl lagplooitjies om sy oë kerf.
“Ek voel presies dieselfde oor haar,” voeg hy by. “Ons is al 17 jaar saam en 11 jaar getroud. Dis ’n seëning om nog so verlief te wees. Ek dink wanneer ek 90 is, sal ek nog haar McSteamy wees en sy my honey. Sy raak net mooier met die tyd. En my dogters, Shay (4) en Evah (6), dink ook ek is vreeslik spesiaal.”
Dis juis om hul onthalwe dat hy fiks en gesond wil bly. Hy
boks en hardloop die Kaapse berge uit. “Ek was nou die dag saam met die kinders op die strand en hulle wou hê ek moet hulle jaag. Hulle is mal daaroor.
“Dit is so ’n seëning. Een van my hoofdoelwitte is om nog wanneer ek 60 en 70 is my kinders op die strand rond te jaag.”
HY WAS nie altyd so gemaklik in sy eie vel nie, erken Nico. “Terwyl ek grootgeword het, het ek puisies aan my gesig gehad. Ek het in st. 9 en 10 (die huidige gr. 11 en 12) draadjies aan my tande gehad en was ongelooflik selfbewus,” vertel hierdie oudleerder van die Pretoria Boys High School.
“Maar een van die wonderlikste goed wat met die ouderdom kom, is dat jy aanvaar wie jy is en hoe jy lyk.
“Ek dink ons moet baie versigtig wees wat ons aantreklik noem. Vir my is iemand mooi wanneer hulle gesond, gelukkig en ontspanne lyk.”
Hy en Christi glo daaraan om gesond te leef. Nico bly weg van kos wat chemikalieë bevat, drink by die huis net gefiltreerde water en gebruik net natuurlike, organiese velsorgprodukte uit die plaaslike skoonheidsreeks Naturalmente. “Ek gebruik net ’n dagroompie en saans ’n ryk vogroom. Ek gebruik nie verfrissers nie.”
Christi slaan ook gereeld tuis “konkoksies” aanmekaar met alles van amandelolie tot laventel wat hulle twee of drie dae per week aanwend om hul vel te voed.
Al verkies hy sy natuurlike haarkleur met grys en al, moet Nico soms sy hare kleur om jonger rolle te vertolk. Omdat hy bang is haarkleurmiddels rig skade aan, gebruik hy Hairprint, ’n produk wat grys hare na sy natuurlike kleur herstel.
Stres kan ’n mens vinnig laat verouder, meen Nico.
“Ek het ’n reël of filosofie dat jy net tot op ’n punt moet stres en dit dan moet laat vaar. As jy aanhou stres, kom dit op negatiewe maniere in jou lyf na vore. Dit kan kanker, hartsiektes, grys hare, plooie en slapeloosheid veroorsaak. Al hierdie faktore dra tot veroudering by,” verduidelikk Nico.
Om te ontspan gaan hardloop hy y langs bergroetes met hul hondekind,, die Hongaarse vizsla Harvey. “Ek iss ook ’n spirituele mens. Die minuutt dat dinge te veel raak, gaan ek op myy knieë. Tot vandag toe slaap ek met ’n Bybel langs my in die bed, tussen my vrou en my.”
Hy was van jongs af sportief. “Toe ek jonk was, het ek provinsiaal (vir die destydse Noord-Transvaal) geswem en toe provinsiaal karate gedoen (ook vir Noord-Transvaal).” In sy 20’s en 30’s het hy bergfiets gery, en in 2012 het hy aan die Cape Epic-bergfietstoer deelgeneem.
Tuis boks hy graag in sy gimnasium in sy motorhuis en op 40 het hy begin draf. Hy doen dit steeds elkeke tweede of derde dag. “Dit het baie gehelp vir die rugpyn wat ek altyd gehad het,” vertel Nico.
Wanneer hy as aanbieder van die joernaalprogram Top Billing die wêreld deurkruis, pak hy ’n paar hardloopskoene in om te oefen en die wêreldstede te verken.
Wat styl betref, glo hy in “gemak voor mode”, sê dié jeans-en-tekkiesman. Hy kies self sy stylvolle klere en speel ook self stilis op die Top Billingstel. En die een ding waarin jy hom nooit sal sien nie? “Crocs!” roep hy uit.
Sy raad aan sy 21-jarige self sou wees: “Don’t sweat the small stuff. En kyk na jou liggaam. Leef in die oomblik,” sê hy.
Dis iets wat hy by sy ma, Loorita, geleer het. Sy is 11 jaar gelede op 56 aan pankreaskanker oorlede.
“Sy was die ander liefde van my lewe. Sy leef voort in Christi. My vrou het ’n ongelooflike passie vir die lewe en is altyd borrelend. Sy is prettig, hou van filosofeer en kan eindeloos giggel oor die lafste goed.”
Hy bly ’n oomblik stil. “Dis vir my so hartseer dat my ma nooit my kinders ontmoet het nie,” sê hy dan.
Juis daarom wil hy gesond leef om elke oomblik saam met sy vrou en kinders ten volle te geniet.
En hy is nie al een nie. Hier is nog akteurs wat net wyser – en aantrekliker – geraak het.
‘As jy aanhou stres, kom dit op negatiewe maniere in jou lyf na vore’