DIE SOUT KAASBORD VIR VOORAF PEUSEL
KAAS Beleë cheddar, emmental, feta, provolone, crottin, cambrieni, simonzola.
BYKOMSTIGHEDE Serrano-of swartwoudham, salami, chorizo-wors, biltong, droëwors, diepgebraaide kappertjiesade, olywe, groentepiekel of piccalilli of koperpenniewortelslaai, radyse en sout, geroosterde taktamatie, gebakte eiervrug en soetrissie, brandrissiesous, pesto, geroosterde Fransebroodstukke of ciabatta, kraakbeskuitjies, geroosterde sade of saadbeskuitjies.
1 KAASKRAAKBESKUITJIES MET DROËVRUGTEPIEKEL
’n Goed beleë kaas soos cheddar of harde kaas soos pecorino, selfs ’n bloukaas, en ’n verskeidenheid sout neute of sade, chorizo en heelkorrelmosterd pas goed by die kraakbeskuitjies en piekel. Meng 250 ml (1 k) koekmeel, 5 ml (1 t) sout en 5 ml (1 t) papawersade en vryf 60 ml (¼ k) koue botter met jou vingerpunte in. Roer 250 ml (1 k) fyn gerasperde beleë cheddar by. Meng 60 ml (¼ k) melk en 5 ml (1 t) Dijon-mosterd en voeg by die droë bestanddele. Meng tot ’n deeg en vorm in ’n plat bol. Draai toe in kleefplastiek en vries 1 uur. (Dit kan 3 maande hou.) Rol 3 mm dun uit, sprinkel sout en roosmarynblaartjies oor, bak 14-16 min. by 180 °C. Laat afkoel en breek in growwe stukke.
2 DROËVRUGTEPIEKEL
Sny 12 elk droëperskes, pere en sagte appelkosies kleiner. Voeg 125 ml (½ k) bosbessies of sultanas by. Week 10 min. in kookwater. Dreineer en druk droog. Pak in ’n
gesteriliseerde bottel. Kook 1-2 klein brandrissies, 2 fyngedrukte knoffelhuisies, 5 ml (1 t) borrie, 500 ml (2 k) appelasyn, 125 ml (½ k) water, 80 ml ( k) heuning, 60 ml (¼ k) olyfolie, 7 ml (1½ t) mosterdsaadjies, 5 ml (1 t) sout, 2 heel kaneelstokkies, 1 steranys,
7 ml (1½ t) peperkorrels en 2 ml (½ t) gekneusde komynsade saam en giet oor die vrugte in die bottel. Maak seker die vrugte is heeltemal bedek. Verseël. Bêre ’n maand lank voor gebruik.
3 GEBAKTE CAMEMBERT
Sit die camembert voor saam met die eiervrug- en broodstokkies, kouevleise en pesto. Meng 2 fyngedrukte knoffelhuisies met 45 ml (3 e) olyfolie en skep oor ’n wiel camembert of cambrieni. Plaas ’n paar takkies tiemie en roosmaryn bo-op en bak sowat 10 min. by 190 °C. Sit dadelik voor saam met eiervrug- en broodstokkies.
4 GEROOSTERDE EIERVRUGSTOKKIES
Voorverhit die oond tot 190 °C. Rooster 45 ml (3 e) sesamsaad in 80 ml ( k) olie tot dit effens verbruin. Sny 3-4 klein eiervrugte in stukke en pak saam met ’n paar klein rooi en
geel soetrissies op ’n bakplaat. Giet die sesamolie oor en oondbraai tot sag, sowat 15 min. Ryg die eiervrug en soetrissies afwisselend aan louriertakkies.
5 GEROOSTERDE BROODSTOKKIES
Breek Franse brood of ciabatta in growwe stukke, pak in ’n enkellaag op ’n bakplaat, sprinkel olyfolie oor en rooster tot bros.
Ryg aan olyftakkies.