NUUT IN DIE FLIEKS / 20TH CENTURY WOMEN
Vrouedrama. Met Annette Bening, Elle Fanning en Greta Gerwig. Regisseur: Mike Mills. 13 DTS. Het op 12 Mei begin.
Waaroor gaan dit?
In 1979 besef ’n enkelma dit is nie so maklik om ’n kind groot te maak soos sy gedink het nie. Die lewe vang ’n mens onkant wanneer jy dit die minste verwag. Sy probeer aan haar jong seun verduidelik presies wat ’n grootmens is, en sy doen dit aan die hand van verskeie ander vroue (en ’n minnaar) wat haar daaglikse lewe beïnvloed.
Wie sal hiervan hou?
Veral vroue wat moeg is daarvoor dat so baie rolprente vroue as iemand se meisie of ooglekkergoed uitbeeld wat net daar is vir mans se plesier. Dorothea (Annette Bening in een van haar beste vertolkings tot nog toe) worstel met ’n weerbarstige seun wat voel sy ma behandel hom onregverdig en verstaan hom nie.
Hoe verduidelik sy vir hom wat seks, liefde en die lewe is? Die rolprent se boodskap is duidelik: Die lewe is wonderlik onvoorspelbaar en laat jou toe om gaandeweg te ontdek – dit gebeur nie alles gerieflik op een slag met jou nie. Vir jong mense voel dit asof hul ouers hulle elke dag ál minder verstaan, maar eintlik ontdek veral ma’s steeds nuwe aspekte van hulself terwyl hulle hul kinders deur die lewe bystaan. Daar is ’n ongebonde vryheid en uitbundigheid aan dié rolprent oor vrouwees en menswees wat ’n mens nie aldag kry nie. Jy kyk na werklike mense, nie akteurs wat rolle vertolk of dialoog opsê nie. Die kwinkslae is blitsvinnig en skerp, maar dit is veral die lewensfilosofie daaragter wat tref. Soms is ander rolprente se dialoog net grapperig genoeg om gehore te laat lag, maar ’n stewige stukkie waarheid steek in hierdie spitsvondige en spontane dialoog.
Kyk nou of wag vir DVD?
’n Groep vroue kan gerus saam hierna gaan kyk. Bestel kaaskoek en pas die fliek voor ’n vrolike kuier in jou gunsteling-koffiekroeg in.
SOORTGELYKE FLIEKS
Mistress America, Frances Ha.
SPRINGMIELIEFEITE
Die Dorothea-karakter is op die regisseur, Mike Mills, se ma gegrond.
Mike het tevore Beginners gemaak, wat glo ook biografies is.
Gedurende die repetisies moes die vroue elkeen hul eie musiek saambring waarna elk van hul karakters sou luister. – LEON VAN NIEROP