Taai Wonder Woman lui nuwe era in
Die gewilde WWonder Woman kry nou haar eie fliek en luil ’n nuwe era in superheld film sheld films in
AS JY al lank genoeg flieks oor superhelde kyk, het jy dalk al die subtiele boodskap opgelet. Batman, Superman, SpiderMan, Iron Man – al die superhelde is mans. Die enkele vroulike superhelde wat wel die afgelope paar jaar op die silwerdoek gesig (en dikwels heelwat lyf) gewys het, is meestal gekies vir hul fraaie voorkoms en het in flieks gespeel soos Catwoman (2004) en Elektra (2005), waaroor sowel kykers as kritici maar louwarm gevoel het. Maar tye verander. Vandat die Amasone- vrouekryger Wonder Woman halfpad deur verlede jaar se Batman v Superman: Dawn of Justice met ’n knal op die toneel verskyn het, het sy behoorlik die Adamsgeslag op hul neus laat kyk.
Wonder Woman – gespeel deur Gal Gadot van Fast & Furious-faam – is nou te sien in haar eie rolprent. En kykers wêreldwyd meen blykbaar dié fliek skop behoorlik stof in die oë van voorgangers soos Man of Steel (2013) en Batman v Superman: Dawn of Justice, wat deur dieselfde maatskappy, DC, vervaardig is.
Hier is alles wat jy van die strydergodin moet weet.
Wie is die heldin met die Amerikaanse vlag aan haar lyf?
Terwyl superhelde soos Batman en Iron Man dikwels gewone ouens is wat hul super vaardighede met die jare verwerf, is Wonder Woman daarmee gebore.
Volgens oorlewering is sy ’n dogter van die Griekse god Zeus. Haar regte naam is Diana en sy het grootgeword op die eilandparadys Themyscira, die tuiste van ’n klomp vrouekrygers genaamd Amasones. Wonder Woman woon al van die antieke tyd af saam met die res van die beeldskone, vreeslose vroue daar in die ongerepte natuur.
Diana se lewe word omgekrap toe ’n Amerikaanse vlieënier, Steve Trevor (Star Trek se Captain Kirk, die akteur Chris Pine), se vliegtuig tydens die Eerste Wêreldoorlog neergeskiet word en hy op haar eiland land. Steve vertel vir Diana mense in die buitewêreld is besig om mekaar op groot skaal uit te moor en sy besluit om hand te gaan bysit.
Dis nie net in die storie dat Wonder Woman oud is nie. Die Amerikaanse sielkundige en skrywer William Moulton Marston het haar al in 1941 geskep as ’n “sterk vroulike figuur” om vir lesers van strokiesprente as positiewe rolmodel te dien. (Toevallig was die einste Marston ook die uitvinder van die leuenverklikkertoestel.)
BRONNE: HOLLYWOOD REPORTER, NEW ZEALAND HERALD, LOS ANGELES TIMES, NEW YORK TIMES, DCCOMICS.COM, EW.COM, THE GUARDIAN, WONDER WOMAN: THE COMPLETE HISTORY (TITAN B00KS)