SKAARSER-AS-SKAARSTE OEWERKONYN VAN DIE KAROO
Storie en illustrasies: Louisa Punt-Fouché (CF-uitgewers, R250). Bestel by: louisepunt@gmail.com
“Pondhaas, vleihaas, doekvoet die langoor-sagvoet-skaam diertjies skugter-skaam in die diep Karoo skaarser-as-skaarste oewerkonyn.”
Die boek lyk soos ’n kinderboek (en kan sekerlik vir hulle gelees word), maar dis ook ’n soort fabel waardeur die lot van die oewerkonyn onder volwassenes se aandag gebring word. Daar is na raming net sowat 250 volwasse oewerkonyne oor, wat die dier een van die mees bedreigde soogdiere ter wêreld maak.
Die skrywer, Louisa PuntFouché, onder meer ’n kliniese sielkundige en “behoeder en bewaarder van diere”, en haar man het die stad verruil vir die Kredouw-olyfplaas in die Prins Albert-vallei. Sy skryf: “Dankie aan die oewerkonyne op die Kredouwplaas wat hulself aangekondig het toe ek die eerste keer op die plaas gaan stap het.”
As sy hulle regtig gesien het, is sy een van die min bevoorregtes, want dié konyn wys nie maklik gesig nie. – ELNA VAN DER MERWE