GOGGAS EN SOOGDIERE
Lapa, R130 elk
My seuntjie, Daniël (2), is versot op die Goggas-boek. Hy wil weet waar elke gogga se oë is, sy mond, wat hy eet en wat hy doen. Die konsep van kamoeflering is een van sy gunstelinge: “Mamma, daai wurm (uitgespreek ‘willem’) is nie ’n poefie nie; dis ’n wurm!” en “Nee, dis nie ’n blaar nie, Mamma, dis ’n mot!”
Vir my is dit lekker om die Afrikaanse name van die goggas te lees: die swaelstertvlinder, die stekelrige posman (’n posmanvlinder se ruspe), die kameelperdkalander, fakkelvlinder en die rooiknie-tarantula.
Die groeperings van die diere in die Soogdiere-boek maak die feite maklik verteerbaar: diere wat in gesinne leef, nagdiere, “superdiere” wat in uiterste omgewings oorleef, buideldiere, diere wat onder die grond woon. Die kolle met “Het jy geweet”-feite op elke blad is baie interessant en voeg iets ekstra by elke bladsy se tema. Die speletjies agterin om jou kennis te toets is ’n prettige manier om die feite te onthou.
Die vrae agter het nog ’n golf van belangstelling ontlok. – DALENA THERON