Dis nie net bloed nie – dit kan ’n nasie red
Junie is Bloedskenkermaand
MELINDA SAMUELS, Margie Symons, Roelof Badenhorst, Chloé Ngcobo . . . Die meeste Suid-Afrikaners het nog nooit van hulle gehoor nie, maar hulle kan getuig van die mag wat elkeen van ons het: die vermoë om ’n lewe te red.
Melinda, Margie, Roelof en Chloé is onder die honderdduisende Suid-Afrikaners wie se lewe danksy bloedoortappings gered is.
Dertig jaar gelede het Melinda vier eenhede bloed gekry nadat sy tydens haar eersteling se geboorte begin bloei het. Dokters het later gesê daarsonder sou sy gesterf het.
Margie het net soveel bloed nodig gehad toe sy 10 jaar gelede in die hospitaal opgeneem is. Sy is ernstig beseer in ’n motorongeluk: Albei haar bene was gebreek en sewe gebreekte ribbes het gelei tot hemopneumotoraks (bloed en lug in die borsholte).
Roelof moes ’n bloedoortapping kry toe hy ná ’n operasie in ’n geïnduseerde koma geplaas is. ’n Dronkbestuurder het hom van sy motorfiets afgery. Hy het sy regterbeen gebreek, sy heup ontwrig en ’n paar ribbes gebreek.
Nadat sy agt weke vroeg gebore is, moes Chloé twee eenhede bloed kry. Haar ma, Lizzie, vertel: “Daardie weke in die hospitaal was die ergste; ek het nie geweet of sy dit sou maak nie. Maar sy het. Vandag is Chloé ’n vierjarige meisietjie wat hou van dans, drama en swem. Ek is so dankbaar teenoor die skenkers wat dit vir my moontlik gemaak het om my dogtertjie te sien grootword.”
Junie is Bloedskenkermaand in SuidAfrika en die Suid-Afrikaanse Nasionale Bloeddiens (SANBD) wil erkenning gee aan elke gewone Suid-Afrikaner wat vreemdelinge die grootste geskenk gee.
“Bloedskenkermaand en Wêreldbloedskenkerdag (14 Junie) is vir hulle. Dit gee ons die kans om hul geskenk te erken en dankie te sê. Dankie dat jy ’n ma se lewe gered het, dankie dat jy ’n ongelukslagoffer se lewe gered het, dankie dat jy ’n vroeggebore baba se lewe gered het. Dankie dat jy hulle ’n leeftyd se herinnerings gegee het. Jou onbaatsugtigheid word raakgesien en dit sal nie vergeet word nie,” sê Silungile Mlambo, die SANBD se nasionale bemarkingsbestuurder.
Die tema vir vanjaar se Bloedskenkerdag is bloedskenking in noodgevalle. “Die meeste bloed word benodig vir nienoodgevalle, soos geboortes en mense met kanker. In Suid-Afrika kom ’n bloedtekort gewoonlik gedurende skoolvakansies voor, want minder mense skenk dan omdat skole en universiteite toe is. Maar die vraag na bloed bly dieselfde,” verduidelik Silungile.
Sy vra dat alle Suid-Afrikaners bloed skenk. “Daar is so baie mense in lewensbedreigende situasies wat bloed nodig het. Bloed het Melinda se lewe gered sodat sy haar dogter kon grootmaak. Ná komplikasies tydens operasies het dit ook Margie en Roelof s’n gered. Dit het Chloé se lewe gered nadat sy vroeggebore is. Dit help kankerpasiënte om behandeling te deurstaan en te oorleef.
“’n Eenvoudige daad kan ’n reuseverskil maak. Van die skenker behels dit ’n paar minute elke 56 dae; vir die ontvanger is dit ’n kans op lewe. Word ’n skenker, want dit is nie net bloed nie; dit red ’n nasie,” sê sy.