SLAGGATE VIR DEKKING
V ERSEKERAARS het verlede jaar R13,1 biljoen aan eise vir lewensdekkingspolisse uitbetaal. Ongelukkig is nog R332 miljoen se eise verwerp. Die begunstigdes van dié polisse het nie ’n sent gekry nie. Ons kyk vandeesweek na die topvyfredes hoekom eise weggewys word. Moenie in hierdie slaggate trap nie.
1 NIE-OPENBAARMAKING
Dit is wanneer polishouers opsetlik nie volledige inligting oor hul gesondheid, beroep, leefstyl en finansies gee nie, verduidelik Henk Meintjies van Liberty Life.
’n Voorbeeld is iemand wat aan hoë cholesterol ly, maar dit nie noem nie omdat dit vanweë medikasie onder beheer is. Eintlik bly cholesterol ’n risiko, en dan word die mens volgens ’n verkeerde risikoprofiel verseker.
Partykeer maak mense foute en die versekeraar kan hulle tegemoetkom, maar probleme kom na vore wanneer jy inligting weerhou met die hoop om laer premies of dekking sonder uitsluitings te kry.
Wees liefs eerlik. Meld enige gevaarlike sportsoorte of stokperdjies soos valskermsweef en skubaduik, of as jou beroep gevaarlik is, soos ’n vlieënier, mynwerker of polisiebeampte.
Dit is ’n baie groter risiko vir die waarde van jou polis om iets weg te steek as om bloot uitsluitings te aanvaar, sê Hennie de Villiers van die Vereniging vir Spaar en Belegging in Suid-Afrika.
2 ONDERSKRYWINGSUITSLUITINGS
Dit is wanneer die polishouer sterf weens ’n siektetoestand wat spesifiek van die lewensversekeringspolis uitgesluit was. Lewensversekeraars kan ’n onderskrywingsuitsluiting toepas as die polishouer byvoorbeeld aan ’n spesifieke siekte soos diabetes ly, maar andersins gesond is. As die polishouer dus in ’n ongeluk sterf, of op ’n ander manier wat nie met diabetes verband hou nie, sal die lewenspolis wel uitbetaal. As die sterfte egter met die uitgesluite toestand verband hou, sal die sterftevoordeel nie uitbetaal nie.
3 SELFDOOD
Alle lewensversekeraars het ’n uitsluitingstydperk van twee jaar vir selfdood. Dis om te keer dat mense lewensdekking uitneem met die voorneme om hulself kort daarna om die lewe te bring.
As ’n polishouer dus sy eie lewe neem binne die eerste twee jaar nadat hy lewensdekking uitgeneem het, sal geen sterftevoordeel aan die begunstigdes uitbetaal word nie.
Die eise wat verlede jaar weens selfdood verwerp is, het byna verdubbel. Henk sê eise vir selfdood en mense wat hulself beseer, neem dikwels in moeilike ekonomiese tye toe.
4 BEDROG
Eisebedrog gebeur wanneer vals dokumente die lewensversekeraar sover kry om ’n eis uit te betaal aan iemand wat nie op die voordeel gereg- tig is nie. Hennie sê sekere sindikate maak dié soort bedrog hul besigheid. Soms word die misdaad deur die polishouer gepleeg, maar dikwels is die begunstigdes ook skuldig.
Versekeraars het afdelings wat sulke bedrog uitsnuffel en dan word die eise verwerp.
5 BESTUUR ONDER DIE INVLOED
As die polishouer sterf terwyl hy onder die invloed van alkohol of dwelms ’n voertuig bestuur het, het hy onwettig bestuur. Die versekeraars vind gewoonlik baie gou uit as dit wel die geval was.
Volgens Hennie moet daar ’n direkte verband wees tussen die invloed van drank of dwelms en die ongeluk wat die dood veroorsaak het. Die versekeraar moet dit kan bewys. As dit wel bewys kan word en die ongeluk is die versekerde se skuld, sal g’n betaling aan sy begunstigde gemaak word nie.