huisvlieg Die
Dié insek is irriterend, grillerig en versprei siektes, maar kan ook van nut wees
DIE meeste mense sal saamstem vlieë is ’n pes. Hulle zoem om jou kop, kom sit in jou kos of op die vensterbank in die kombuis. Boonop is daar derduisende verskillende spesies. Maar selfs gewone huisvlieë dien ’n doel – hulle is kos vir ander spesies, soos voëls, paddas en slange.
Die huisvlieg ( Musca domestica) is dalk een van die mees algemene insekte wat ’n mens teëkom, en met goeie rede. Vlieë word byna oral aangetref waar mense is. Dis net in Antarktika en dalk ’n paar afgeleë eilande in die Poolstreke waar geen vlieë is nie. Vlieë is gewoond daaraan om saam met mense en diere te 3 leef; daarom is hulle aangepas om te oorleef in enige habitat waar mense woon.
Soos mense met die eeue per skip, vliegtuig, trein of perdekar na nuwe plekke gereis het, het vlieë altyd saamgegaan. Wetenskaplikes glo die huisvlieg het ontwikkel in die Senosoïese era (mees onlangse tyd), wat 65 miljoen jaar gelede begin het, en moontlik in die Midde-Ooste, van waar dit oor die wêreld versprei het.
Vlieë is nie net irriterend nie; hulle versprei ook siektes. Die huisvlieg floreer op goed wat ons as vuil beskou: vullis, dieremis, riool en ander grillerige dinge. Jy sal hulle ook aantref op komposhope, waar dooie plantmateriaal en verrottende groente en vrugte is. Vlieë het die slegte gewoonte om siektes saam met hulle van plek tot plek te dra.
’n Huisvlieg sal op ’n hoop mis land en dan vlieg na waar jy besig is om te braai en op jou tjoppie of aartappelslaai rondloop. Meer as 100 mense- en dieresiektes word deur huisvlieë versprei. Dit sluit in cholera, salmonella, tifus en parasitiese wurms. Mense gebruik allerlei gifstowwe om van vlieë ontslae te raak.