Monaco-tweeling soet en slim daarby
Jacques en Gabriella was te skattig toe hulle onlangs in die openbaar verskyn en is boonop slim en goed in swem
’NTWEELING is ’ n handvol en ’n tweejarige tweeling moeilikheid in dubbelmaat wanneer albei woedeuitbarstings begin kry, sou ’n mens dink. Tog was seker die beroemdste tweejarige tweeling die toonbeeld van soete onskuld – en oulik verby – toe prins Jacques en prinses Gabriella van Monaco onlangs in die openbaar verskyn. Met hul eenderse blonde krulkoppe het hulle soos engeltjies gelyk, en hul gedrag was ewe onberispelik.
Die tweeling was saam met hul ouers, prins Albert en prinses Charlene, by die seremonie met die vertrek van die omgewingsnavorsingskip die Yersin uit Port Hercules in Monaco. Dit onderneem ’n drie jaar lange ekspedisie.
Ewe deftig in ’n swart rokkie met kapmoue uitgevat en met ’n wit strikkie in haar blonde hare, het Gabriella op haar pa se skoot gesit. Dit het gelyk of sy die verrigtings terdeë geniet, want sy het hande geklap en lekker gelag.
Haar tweelingbroer, die Monegaske se troonopvolger, klein Jacques, het stil op sy ma se knie gesit, uitgeknip soos ’n toekomstige seiljagvaarder in sy wit broek en wit T-hemp met die Monaco Expeditions-kenteken daarop.
Die tweeling en Charlene (39), elegant in ’n rooi eenskouerskepping, het prins Albert (59) se geliefkoosde liefdadigheidsprojek – die bewaring van die wêreld se oseane – kom steun.
Die monarg gaan self in verskillende hawens op die roete by die wetenskaplikes aan boord van die Yersin aansluit terwyl dit in die trope rondvaar om die toestand van verskillende mariene ekostelsels te bepaal.
Al kan Albert met reg trots wees op sy stroopsoet tweeling se gedrag toe hulle
die skip kom wegsien, is hulle soos enige ander peuters opperste woelwaters.
Met hul manewales op die balkon van die Prins Se Paleis in Januarie het Jacques en Gabriella gewys hul Britse eweknieë, prins George (4) en prinses Charlotte (2), is nie die enigste oulike bloubloed-kleingoed nie.
Met die viering van die Sint Devotaseremonie, ter ere van die beskermheilige van Monaco, het die tweeling in oulike vaal jassies saam met hul ouers op die paleis se balkon verskyn. Die opgewonde prinsie en prinsessie het vir die grootste deel van die geleentheid oor hul ouers se skoot geklouter. Hulle het selfs deur die balkonreling probeer kruip om die feestelikhede onder beter te bekyk. Jacques het ook sy pa ewe parmantig aan die neus gevat – ’n skattige oomblik wat ’n gelukkige fotograaf met sy kamera vasgevang het.
Die kroonprinsie en sy sussie, wat luidens berigte vandeesmaand hul eerste amptelike toer saam met hul ouers meemaak, is nie net oulik nie; hulle is slim ook.
“Hulle weet reeds wie Donald Trump is,” het Albert tydens ’n onderhoud in April met die Amerikaanse tydskrif People gespog. “Hulle weet wie die president van Frankryk is.” En hul politieke kennis is nie tot Europa beperk nie. “Jy vra hulle: ‘ Wie is die hoof van Rusland?’ En ja, hulle antwoord: ‘Poetin.’ ”
TERWYL Albert die tweeling touwys maak oor die wêreldpolitiek, leer hul ma, ’n gewese Suid- Afrikaanse Olimpiese swemmer, hulle Afrikaans en Zoeloe praat, en ook swem. As kranige sportvrou en kampvegter vir verskeie wêreldwye liefdadigheidsorganisasies vir sport en ’n stigting wat toegespits is op waterveiligheid, het Charlene gesorg dat die twee so gou moontlik leer swem.
Hulle is nou so tuis soos visse in die water. En dit lyk asof hier nog ’n swemkampioen – of twee – op pad is Olimpiese Spele toe.
“Hulle is soggens ’n volle twee uur in die swembad en weer smiddae,” vertel Albert. “Ek probeer elke dag hul middagsessie bywoon.”
Dit lyk asof Jacques sy sussie in die swembad uitstof.
“Die swembad wat ons by Roc Agel het, is nie ’n oorloopswembad nie en hy kan sonder enigiemand se hulp self by die swembad in- en uitklim,” het sy pa aan People vertel. Roc Agel is die Grimaldi’s se somerhuis aan die skilderagtige hang van die berg Agel in Frankryk, ’n kilometer of wat van die piepklein prinsdom af.
“Jacques wil nie sy lugarmbande dra nie. Nou die dag het hy agt voet (sowat 3,5 m) sonder bystand geswem, en Gabriella was nie ver agter nie.”
Jacques klop dalk sy sussie in die water, maar dit lyk asof sy hom ’n ding of twee in die klaskamer sal kan wys.
Albert het laat blyk Gabriella is die slimkop. “Hulle snap nou goed baie vinnig, veral Gabriella,” het hy gesê. “Sy was die eerste met letters en syfers, maar Jacques het haar nou ingehaal. Ek dink dis alles te danke aan Charlene se in-
Dit lyk of hier nog ’n swemkampioen – of twee – op pad is Olimpiese Spele toe
vloed,” het die prins bygevoeg.
Ook in vorige onderhoude was hy vol lof vir sy elegante blonde vrou as ma en prinses. In ’n onderhoud met People in 2015 het Albert vertel Charlene staan elke oggend douvoordag op.
“Sy wil baie graag heeltyd by haar kinders wees. Sy staan soggens sesuur saam met die kinders op en pas hulle die hele oggend op; elke dag,” het die prins beklemtoon. “Ek dink nie hulle sou so glimlaggend en gelukkig gewees het as sy nie so ’n goeie ma was nie.”
Dis duidelik dat Albert, ook die pa van Jazmine (25) en Alexandre (13) uit vorige verhoudings, Charlene se toegewydheid aan hul kroos heelhartig steun, al het sy voorheen onder kritiek deurgeloop omdat sy koninklike geleenthede misgeloop het.
“Sy moes die afgelope jaar ’n aantal sake effens anders reël,” het hy in dieselfde onderhoud gesê. “Sy moes talle verhuisings reël, en dit was vir haar ’n groot taak, maar sy het bewys sy is ongeloofik goed georganiseer en ’n wonderlike ma.”
Ná ’n huwelik van ses jaar was die koninklike egpaar die toonbeeld van huweliksgeluk tydens die Monaco Expeditions-geleentheid. Hulle het mekaar gereeld liefderyk aangekyk en aangeraak.
Maar sake het nie altyd so seepglad vir hulle verloop nie.
Albei het al openhartig gepraat oor hoe moeilik dit vir iemand met ’n burgerlike agtergrond is om by ’n koninklike lewe aan te pas. Albert het die onderwerp onlangs weer aangeroer toe hy verwys na Brittanje se prins Harry (32) en sy Amerikaanse meisie, Meghan Markle (36).
“Hulle vaar tot dusver baie goed,” het Albert gesê, en bygevoeg Meghan, wat in die trefferreeks Suits speel, is as aktrise natuurlik gewoond aan die kollig. Tog kan die oorgang na die soort roem waaraan koninklikes sedert hul geboorte blootgestel word “taamlik moeilik” wees, het hy ook gemaan.
“Kort voor lank sal sy (Meghan) die volle aanslag moet trotseer. Ek kan my nie voorstel hoe dit vir hulle – vir haar – sal wees nie. Dit is moeilik vir enigeen om te hanteer. Dit was ook moeilik vir Charlene,” het hy erken.
Albert, die seun van die Amerikaanse rolprentster Grace Kelly, het vertel sy ma het gesê om aktrise te wees het haar in ’n sekere mate voorberei op die roem as prinses. “Dit help jou die media ’n bietjie leer ken. Maar hulle was destyds effens meer eerbiedig.
“Die pers, veral die fotograwe, het blykbaar verander.”
Maar selfs al het jy, soos wyle Grace en nou Meghan, naam gemaak as aktrise, meen hy “niks kan jou regtig voorberei op die volgehoue pas” van die koninklike lewe nie.
Vir Harry en sy meisie het Albert intussen ’ n brokkie eenvoudige raad: “Bly kalm en gaan voort.”
‘Gabriella was eerste met letters en syfers, maar Jacques het haar ingehaal’