Oudgeneraal moet Withuis regruk
Trump het ’n oudoffisier as sy regterhand aangestel nadat dinge in die Withuis begin handuit ruk het
AS ’N rateltaai beroepsoffisier het hy in van die gevaarlikste oorlogsones diens gedoen. John Kelly het respek en lojaliteit by die soldate onder sy bevel afgedwing. Tog waarsku ontleders dié oudgeneraal met sy bors vol medaljes betree nou die gevaarlikste slagveld van sy lewe: die Withuis.
As die nuwe Withuis-personeelhoof is John die onvoorspelbare, plofbare pres. Donald Trump se regterhand. En dié werk word nie verniet as die moeilikste in Washington bestempel nie. John se voorganger, Reince Priebus, het immers net ses maande gehou voor hy afgedank is nadat Trump hom tydens sy inhuldiging bedank en gekomplimenteer het.
Trump was nog altyd die soort baas wat daarvan hou om onmin te saai. Hy steek mededingers in sy span teen mekaar op en moedig faksies en binnegevegte aan. In sy werklikheidsreeks, The Apprentice, het dit vir skitterende kykstof gesorg, maar in die hoogste amp is dit ’n ongewenste strategie.
Waarnemers sê onder Trump (71) raak die Withuis ál meer wanfunksioneel. Maar met dié dat kernlede van sy personeel in rekordgetalle bedank, rebelleer, uithaak of afgedank word, lyk dit asof selfs hy besef dis tyd om sake reg te ruk.
Wie is dit wat hy aangewys het om, aldus die New York Times, orde en dissipline in die Withuis te herstel? Einste die man wat eens slagvelde moes aandurf.
“John Kelly sal hom puik van sy taak kwyt,” het Trump sy jongste aanstelling geprys. “(Hy) is ’n ster en hoogs gerespekteerd. Hy is ’n goeie, goeie Amerikaner.”
John se aanstelling kom in dieselfde tyd waarin die Withuis se woordvoerder, Sean Spicer, bedank het en Reince en Anthony Scaramucci, die direkteur van kommunikasie, afgedank is. Baie mense meen die saaklike benadering van die voormalige seesoldaat, wat sedert Januarie Trump se minister van binnelandse veiligheid was, is net wat nodig is.
“Lank kon ’n mens nie veel goeds oor Trump sê nie, maar Kelly se werwing dui daarop hy leer, baie laat, uit sy foute en is in staat tot ’n geringe mate van beskeiden- heid,” skryf die politieke kommentator TA Frank in ’n artikel vir vanityfair.com.
Waarnemers sê sedert John se aanstelling het Trump sy sokkies opgetrek. Hy is beter voorbereid op vergaderings. Maar ingeligtes sê hoewel John ingebring is om die sweep te klap, sal hy ’n groot fout begaan as hy bevele aan sy baas uitdeel – of die onvoorspelbare president se werkwyse probeer verander.
“Enigeen wat dink hulle kan Donald Trump verander, ken Donald Trump nie,” sê Corey Lewandowski, die president se voormalige veldtogbestuurder.
’N MAN SO NA TRUMP SE HART
Sy militêre prestasies: Kleintyd was Trump so rebels, sy pa het hom na ’n militêre skool gestuur. Die president sê die New Yorkse Militêre Akademie het hom gevorm en dissipline geleer. John, wat al
as ’n “onberispelike seesoldaat” beskryf is, sal Trump dus diep beïndruk.
Hy dwing respek af: Op 67 jaar is John en Trump tydgenote; die president sal dus waarskynlik versigtiger trap met hom as met sy voorganger, Reince (45).
Nie ’n jabroer nie: Diegene in die binnekring was verstom toe John ’n maand gelede midde-in ’n vergadering in die Ovaal Kantoor eis almal verlaat die vertrek sodat hy openhartig met Trump kan praat. Dié het eers teëgestribbel, maar John het voet by stuk gehou.
Die generaal het ook bekendgemaak hy stem nie saam met Trump se reisverbod teen sekere Moslemlande nie. Hy meen dis “onvanpas” om individue vanweë hul godsdienstige of etniese agtergrond uit te sonder.
Hy het hom ook uitgespreek teen Trump se voorgenome grensmuur met Mexiko. Volgens hom is dit “onwaarskynlik” dat dit ooit gebou sal word. Hy glo gevorderde moniteringstegnologie, lugwaarneming en heinings by kernpunte bied die beste beveiliging.
‘OPERASIE WITHUIS-REGRUK’
Klim met die snoeiskêr in: Een van John se eerste stappe in sy nuwe rol was om Anthony in die pad te steek. Trump het The Mooch, soos hy algemeen bekendstaan, net 10 dae tevore aangestel. Maar John het geweier om sy nuwe amp te aanvaar tensy hy toestemming het om die grootbekmiljoenêr die trekpas te gee. John het gemeen Anthony het met sy uitdie-vuis-opmerkings en beledigings te veel brûe verbrand.
Lig almal in wie in beheer is: Toe Reince in beheer was, het die Ovaal Kantoor se deur glo deurentyd oopgestaan en kon begunstigde amptenare na hartelus in- en uitstap. Nou hou die oudgeneraal die deur toe en besluit wie ingaan om met die president te beraadslaag.
Man van aksie: Op John se aandrang is vergaderings in die Ovaal Kantoor nou
HOE HY GEKOM HET WAAR HY IS
“korter en toegespits op die geskeduleerde onderwerp”. Met sy aftrede in 2016 was John Amerika se langsdienende vlootgeneraal. Hy het in Boston grootgeword en in sy langer as 42 jaar in die weermag in Viëtnam en drie keer in Irak diens gedoen.
Hy het sy loopbaan afgesluit as hoof van die Amerikaanse Suidelike Kommandement. As sodanig was hy belas met die stryd teen Suid-Amerikaanse dwelmkartelle asook met Amerika se omstrede vlootbasis in Guantanamobaai, Kuba, waar vermeende terroriste aangehou en ondervra word. Hy het bewerings dat die tronk bloot ’n teelaarde vir terreur is as onsinnig afgemaak. “Om die hel uit Isis in Irak, Afganistan en Sirië te skiet sal meer terroriste kweek as dat ons Guantanamo oophou.”
Hy het ook gekap na pres. Barack Obama se besluit om gevegsposte vir vroue oop te stel en opspraakwekkend gesê dit sal tot ’n “verlaging in standaarde” lei.
John is sedert 1976 met Karen getroud. Hul seuns, John en Robert, het ook seesoldate geword. Maar Robert (29) is in 2010 dood toe hy in Afganistan op ’n landmyn trap. John het later onthul om sy vrou van hul seun se dood te vertel was die moeilikste ding wat hy al moes doen. “Ek het met die trap opgestap, Karen wakker gemaak met die nuus en haar hart gebreek,” het hy gesê. Die egpaar het ook ’n dogter, Kathleen. Ná ’n lang loopbaan het John daarna uitgesien om die pas te verslap, maar Trump het ander planne gehad. Verlede jaar, net agt maande nadat hy afgetree het, het die president se span hom gebel met die aanbod van die ministersamp.
In ’n onlangse onderhoud het John erken hy was nie gretig nie, maar sy vrou het hom omgepraat. “Eie aan haar aard het Karen gesê: ‘ Wel, as die Kelly-gesin niks anders is nie, is ons ’n gesin wat ons land dien. En as hulle dink hulle het jou nodig, dan moet jy dit doen.’ ”
WAT DOEN DIE PERSONEELHOOF?
Hy word as die tweede magtigste persoon in Washington beskou, naas die president. Dit sal John se verantwoordelikheid wees om die aktiwiteite van die president te koördineer en daaroor toesig te hou – en toegang tot Trump te beheer.
Hy sal alle kernpersoneel vir die Withuis uitsoek en oor hulle toesig hou, met die kongres en ander belangegroepe onderhandel om die president se agenda uit te voer en alle kommunikasie vanuit die Ovaal Kantoor bestuur. Dis ’n moeilike taak en dalk hoekom personeelhoofde dikwels nie lank aanbly nie. In sy agt jaar het Obama vyf gehad.